پاکستانی اداکارہ ثنا جاوید کے سابق شوہر گلوکار عمیر جسوال نے پہلی بار اپنی طلاق اور دوسری شادی سے متعلق خاموشی توڑ دی۔
پاکستان انڈسٹری کی معروف گلوکار عمیر جسوال نے گزشتہ ماہ اکتوبر کے آغاز پر انسٹاگرام پر ایک تصویر کے ساتھ اپنی دوسری شادی کا اعلان کیا۔
عمیر جسوال نے اپنی تصویر کے ساتھ کیپشن میں ’الحمداللہ‘ لکھا اور قرآن شریف کی آیت بھی لکھی جس کا مطلب تھا ’ آپ کا رب عنقریب آپ کو اتنا کچھ عطا فرمائے گا کہ آپ راضی ہو جائیں گے‘۔
تاہم اب عمیر جسوال نے اپنی دوسری شادی کے بعد پہلی بار ایک پروگرام میں شرکت کی جس میں میزبان نے انہیں شادی کی مبارکباد پیش کی اور ساتھ ہی شادی کے بعد تبدیل ہونے والی زندگی سے متعلق پوچھا گیا۔
انہوں نے کہا کہ ’مجھے شادی کے لیے مبارکباد دینے کا شکریہ، شادی کے بعد زندگی خوبصورت گزر رہی ہے، خدا مجھ پر بہت مہربان رہا ہے، اللہ ہمیشہ انسان کو ایک سفر کے ذریعے صحیح مقام پر پہنچاتا ہے۔
View this post on Instagram
عمیر جسوال نے کہا کہ جب آپ کو تقدیر درست مقام پر پہنچادیتی ہے تب آپ کو احساس ہوتا ہے کہ اللہ نے آپ کو ایک مخصوص سفر سے کیوں گزارا، پھر آپ اللہ کا شکر ادا کرتے ہیں۔
عمیر جسوال نے بات جاری رکھتے ہوئے کہا میں نے سوشل میڈیا پر بہت سے لوگوں سے بات کی تھی جو کافی پریشان تھے، مجھے پیغامات موصول ہوئے اور ناصرف میرے مداح بلکہ دیگر افراد بھی میرے لیے فکر مند تھے، میں انہیں یہ ہی سمجھا رہا تھا کہ اللہ کو یہ ایسے ہی منظور تھا۔
گلوکار نے کہا کہ شادی کے اعلان کے بعد مجھے غیر معمولی ردعمل ملا، ایک تصویر سے ہی مداح اتنا خوش ہوئے، میں بہت خوش ہوں کہ لوگ مجھ سے محبت کرتے ہیں اور میرے لیے نیک خواہشات کا اظہار کرتے ہیں۔
واضح رہے کہ گلوکار عمیر جسوال کی پہلی شادی اداکارہ ثنا جاوید سے ہوئی تھی، دونوں کا نکاح اکتوبر 2020 میں ہوا تھا، تاہم گزشتہ سال جوڑے کے درمیان علیحدگی کی افواہوں نے اس وقت زور پکڑا جب دونوں نے اپنے انسٹاگرام پروفائل سے نکاح کی تصاویر ڈیلیٹ کردی تھیں۔
