لاہور : مشیر داخلہ پنجاب عمرسرفراز چیمہ کا کہنا ہے کہ عمران خان کو تھریٹس بڑھ گئی ہیں، اس کی انٹیلی جنس رپورٹس بھی ہیں، اسی لئے سیکیورٹی فراہم کررہے ہیں۔
تفصیلات کے مطابق مشیر داخلہ پنجاب عمرسرفرازچیمہ نے اے آر وائی نیوز کے پروگرام آف دی ریکارڈ میں گفتگو کرتے ہوئے کہا کہ عمران خان کی جان کوخطرہ ہے اس کی انٹیلی جنس رپورٹس بھی ہیں، پہلے بھی انٹیلی جنس رپورٹس تھیں کہ عمران خان پرحملہ ہو سکتا ہے۔
عمرسرفرازچیمہ کا کہنا تھا کہ وزیرآباد میں عمران خان پرحملہ بھی ہوا اللہ کا شکر ہے وہ محفوظ رہے، عمران خان کوتھریٹس بڑھ گئی ہیں، اسی لئے سیکیورٹی فراہم کررہےہیں۔
مشیر داخلہ پنجاب نے کہا کہ حقیقی آزادی مارچ میں شرکت پر عمران خان کو بھرپور سیکیورٹی دی جائے گی۔
انھوں نے بتایا کہ وزیر آباد حملے کی رپورٹ کے مطابق حملہ کرنے والے 2 شوٹر تھے، ن لیگ کی قیادت جو گفتگو کر رہی ہے حملہ آور بھی وہی گفتگو کر رہا ہے ، مذہبی منافرت سے متعلق ن لیگ قیادت گفتگو کررہی ہے۔
عمرسرفرازچیمہ نے کہا کہ گزشتہ چند ماہ سے باقاعدہ ن لیگ کی جانب سےمہم چلائی جارہی ہے، واقعےکومذہبی جنونیت قراردینےکی سازش سب کے سامنے آچکی ہے، عمران خان پر حملہ کوئی مذہبی جنونیت نہیں بلکہ باقاعدہ سازش تھی۔
مشیر داخلہ پنجاب کا کہنا تھا کہ جے آئی ٹی میں دیگر اداروں کو شامل نہ کرنے کا مقصد ہے، جن لوگوں پرالزامات ہیں وہی لوگ مختلف اداروں کو ہیڈ کررہےہیں، جن پر الزامات ہیں وہ اداروں کی سربراہی کر رہے تو ان کے اہلکار کیسے شفاف تحقیقات کریں گے۔
انھوں نے کہا کہ ہم نےجوجےآئی ٹی بنائی ہے وہ آئین وقانون کے مطابق ہے، وفاق کی جانب سے جے آئی ٹی کومتنازع بنانے کیلئے بیانات دیئے جارہے ہیں۔
عمرسرفرازچیمہ کا کہنا تھا کہ ملزم کی ویڈیوریلیز سے متعلق تحقیقات جاری ہیں، ذمہ داروں کیخلاف کارروائی ہوگی، جےآئی ٹی ملزم کی ویڈیو ریلیز کی بھی تحقیقات کرےگی، جے آئی ٹی نےکل سے اپنا کام شروع کر دیا ہے،جلد سے جلدرپورٹ آجائےگی۔
