پاکستان نے اقوام متحدہ کی سلامتی کونسل سے غزہ پر خاموشی توڑ کر عملی اقدامات کرنے کا مطالبہ کر دیا۔
فلسطینی مقبوضہ علاقوں کی صورتحال پر اقوام متحدہ کی سلامتی کونسل کے اجلاس سے خطاب میں پاکستان کے مستقل مندوب عاصم افتخار احمد نے کہا فلسطین میں جو کچھ ہو رہا ہے وہ انسانیت کیساتھ سنگین مذاق ہے۔
عاصم افتخار احمد نے کہا کہ ہم ایسے ادارے کا حصہ نہیں بن سکتے جو محض تماشائی بنا رہے، ہم اس اخلاقی دیوالیہ پن کا حصہ بننے سے انکار کرتے ہیں۔
پاکستان کے مستقل مندوب کا کہنا تھا کہ سلامتی کونسل اپنی ساکھ برقرار رکھنے کیلئے اپنی قراردادوں پر عملدرآمد کو یقینی بنائے۔
واضح رہے کہ اسرائیل نے جنگ بندی معاہدہ کے بعد مزید 1100 فلسطینیوں کو شہید کیا، جبکہ فلسطین میں بین الاقوامی قوانین کو کھلم کھلا نظرانداز کیا جا رہا ہے۔
خیال رہے کہ عاصم افتخار نے اقوام متحدہ میں پاکستان کے مستقل مندوب کا منصب سنبھال لیا، عاصم افتخار احمد نے 31 مارچ 2025 کو اپنی مدت مکمل کرنے کے بعد اس منصب سے سبکدوش ہونے والے سفیر منیر اکرم کی جگہ لی ہے۔
