نیویارک: اقوام متحدہ کی جنرل اسمبلی میں غزہ میں جنگ بندی کی قرارداد بھاری اکثریت سے منظور کرلی گئی۔
تفصیلات کے مطابق اقوام متحدہ کی جنرل اسمبلی نے غزہ میں فوری جنگ بندی کی قرار داد منظور کرلی۔
جنگ بندی کی قرارداد میں 149 ممالک نے حمایت اور12 نے مخالفت میں ووٹ دیا جبکہ انیس ممالک نے رائے شماری میں حصہ نہیں لیا۔
قرارداد میں نہ صرف حماس کی جانب سے یرغمال بنائے گئے افراد کی رہائی کا مطالبہ کیا گیا بلکہ اسرائیل میں قید فلسطینیوں کی واپسی اور غزہ سے مکمل فوجی انخلا بھی شامل ہے۔
قرارداد میں انسانی امداد تک بلا رکاوٹ رسائی کا مطالبہ کیا گیا اور عام شہریوں کو بھوکا رکھنے اور امدادی رسد روکنے جیسے اقدامات کی شدید مذمت کی گئی ہے۔
مزید پڑھیں : یونیسف نے غزہ میں 5سالہ بچے کی دل دہلا دینے والی تصویر جاری کردی
یاد رہے غزہ میں اسرائیلی فورسز نے ظلم و بربریت کی انتہا کر دی، صرف چوبیس گھنٹوں کے دوران بمباری اور فائرنگ کے مختلف واقعات میں ایک سوبیس فلسطینی شہید ہو گئے، سب سے المناک واقعہ امداد کے منتظر شہریوں پر فائرنگ کا تھا، جس میں ستاون افراد شہید اور درجنوں زخمی ہوئے۔
خان یونس میں بے گھر افراد کے خیموں کو نشانہ بنایا گیا، جہاں چار مزید فلسطینی زندگی کی بازی ہار گئے۔
صحت حکام کےمطابق اسرائیلی حملوں میں شہدا کی مجموعی تعداد پچپن ہزار سے تجاوز کرچکی ہے، جن میں بڑی تعداد عورتوں اور بچوں کی ہے۔ ہر دن، ہر لمحہ غزہ کی فضاؤں میں صرف بارود کی بو اور چیخوں کی گونج باقی رہ گئی ہے۔
