نیویارک: اقوام متحدہ کے سیکریٹری جنرل انتونیو گتریس نے بھارت پر زور دیا ہے کہ مقبوضہ کشمیر میں انسانی حقوق کی پاسداری یقینی بنائے۔
تفصیلات کے مطابق اقوام متحدہ کے سیکریٹری جنرل انتونیو گتریس نے کشیدگی کے خاتمے کے لیے پاکستان اور بھارت سے مذاکرات کی راہ نکالنے کا مطالبہ کیا۔
ان کا کہنا تھا کہ پاکستان اور بھارت مذاکرات کے ذریعے مسئلہ کشمیر کو حل کریں، مسئلہ کشمیر کے پر امن حل کے لیے آواز اٹھاتا رہوں گا۔
سیکریٹری جنرل اقوام متحدہ کا مزید کہنا تھا کہ مسئلہ کشمیر کے حل کے لیے پاک بھارت مذاکرات ضروری ہیں، فریقین کو سنگین مسئلے پر بات چیت کرنی پڑے گی۔
قبل ازیں رکن امریکی کانگریس شیلا جیکسن لی نے کہا ہے کہ جموں وکشمیرکی حیثیت کی تبدیلی کے فیصلے سے خطرناک بحران نے جنم لیا ہے، بھارتی فوج نے نہتے کشمیریوں کی زندگی اجیرن کردی ہے۔
مسئلہ کشمیر کے باعث پاکستان اور بھارت نیوکلیئر جنگ کے دہانے پر ہیں: شیلا جیکسن
اپنے تحریری بیان میں شیلا جیکسن کا کہنا تھا کہ مسئلہ کشمیر کے باعث پاکستان اور بھارت نیوکلیئر جنگ کے دہانے پر ہیں، جموں وکشمیر کی حیثیت کی تبدیلی کے فیصلے سے خطرناک بحران نے جنم لیا ہے۔
خیال رہے کہ بھارتی جارحیت کے خلاف پاکستان ہر فورم پر آواز اٹھا رہا ہے، وزیراعظم عمران خان سعودی عرب کے اہم دورے پر آج روانہ ہوں گے جہاں اس مسئلے پر اعلیٰ قیادت سے ملاقاتیں ہوں گی۔
