نیویارک: اقوامِ متحدہ کے سیکریٹری جنرل انٹونیو گوٹیریس نے کہا ہے کہ میانمار میں مسلمانوں پر حملے ناقابل قبول ہیں، فوجی آپریشن کے نام پر روہنگیا کے مسلمانوں کی نسل کشی جاری ہے۔
برطانوی نشریاتی ادارے کے مطابق اقوام متحدہ کے سیکریٹری جنرل نے برما کی حکومت سے مطالبہ کیا کہ وہ رکھائن میں روہنگیا مسلمانوں کے خلاف جاری فوجی آپریشن فوری طور پر بند کردے۔
انہوں نے مطالبہ کیا کہ برمی فوج کے مظالم سے میانمار میں قیامت خیز انسانی المیہ جنم لے رہا ہے، مظلوم مسلمانوں پر حملے ناقابل قبول ہیں لہذا حکومت فوری طور پر فوجی کارروائی بند کرے۔
پڑھیں: برمی مسلمان عید الاضحیٰ پر قربانی بھی نہیں کرسکتے
انٹونیو گوٹیریس نے عالمی برادری سے اپیل کی کہ وہ روہنگیا کے مظلم مسلمانوں کو ہرممکنہ مدد فراہم کریں کیونکہ روہنگیا سے بڑی تعداد میں مسلمان بنگلہ دیش پہنچے رہے ہیں جن کی تعداد 3 لاکھ سے تجاوز کرگئی ہے۔
سیکریٹری جنرل نے مطالبہ کیا کہ انسانی بحران سے نمٹنے کے لیے روہنگیا کے مہاجرین کے لیے فوری اقدامات کیے جائیں اور کیمپس میں خوراک و طبی سہولیات کا فوری انتظام کروایا جائے تاکہ لوگوں کی زندگیوں کو محفوظ بنایا جاسکے۔
