نیویارک : پاکستان اقوام متحدہ کی سلامتی کونسل کا 8 ویں مرتبہ غیر مستقل رکن منتخب ہوگیا، پاکستان نے ایشیائی ممالک کے گروپ سے متفقہ امیدوار کے طور پر حمایت حاصل کی۔
تفصیلات کے مطابق اقوام متحدہ میں پاکستانی مندوب منیر اکرم نے اے آر وائی نیوز سے خصوصی گفتگو کرتے ہوئے کہا ہلے کہ پاکستان کا سیکیورٹی کونسل کا غیرمستقل رکن منتخب ہونا انتہائی اہمیت کا حامل ہے۔
انہوں نے کہا کہ پاکستان سلامتی کونسل میں ترقی پذیر ممالک کی آواز بنے گا، فیصلہ ساز کونسل کا رکن منتخب ہونا بہت اہم ہے، عالمی قوانین پر عمل در آمد کرانا ہماری اولین ترجیحات میں شامل ہوگا۔
انہوں نے کہا کہ افغانستان سے دہشت گردی کے خطرات پر گفتگو بھی ترجیحات میں شامل ہے، اور یوکرین کی جنگ بھی فوری طور پر رکنی چاہیے۔
پاکستانی مندوب نے کہا کہ ہندوستان اور اسرائیل کا پڑوسی ممالک کے ساتھ برتاؤ قابل تشویش ہے، سیکیورٹی کونسل میں کئی ممالک کا پاور پلے ہے جس کو ختم کرنا ہوگا۔
منیر اکرم کا کہنا تھا کہ پاکستان سیکیورٹی کونسل میں اصلاحات ہوتے دیکھنا چاہتا ہے، بھارت کے ساتھ تمام معاملات پُرامن طریقے سے حل کرنا چاہتے ہیں۔
انہوں نے کہا کہ طالبان نے ٹی ٹی پی کو محفوظ پناہ گاہیں فراہم کی ہیں، طالبان کو واضح کردیا ہے کہ دہشت گردی کسی ملک کے مفاد میں نہیں۔
پاکستانی مندوب نے کہا کہ فلسطینیوں کو ان کا حق خود ارادیت دیتے ہوئے دنیا کو فلسطین کو ایک ریاست کا درجہ دینا ہوگا۔
ان کا مزید کہنا تھا کہ دنیا میں انتہا پسند لیڈر شپ معاملات میں بگاڑ پیدا کر رہی ہے، یوکرین کی جنگ بھی فوری طور پر رکنی چاہیے۔
خیال رہے کہ سلامتی کونسل 15 ممالک پر مشتمل ہے، جس میں 5 مستقل اور 10 غیرمستقل ارکان شامل ہیں، غیر مستقل اراکین کو جنرل اسمبلی 2 سال کی مدت کے لیے منتخب کرتی ہے جب کہ پاکستان سلامتی کونسل کا 7مرتبہ غیر مستقل رکن رہ چکا ہے، جب کہ یہ پانچوں امیدوار اس سے پہلے بھی یو این ایس سی میں خدمات انجام دے چکے ہیں، پاکستان 7 بار، پاناما 5، ڈنمارک 4، یونان 2، اور صومالیہ ایک بار اس نشست پر منتخب ہوچکا ہے۔
