لاہور: اقوام متحدہ کے ادارہ برائے اطفال یونیسیف نے اسموگ کو پنجاب کے ایک کروڑ دس لاکھ بچوں کیلئے سنگین خطرہ قراردے دیا۔
تفصیلات کے مطابق اقوام متحدہ کے ادارہ برائے اطفال یونیسیف نے اپنے بیان میں کہا ہے کہ لاہور اور کئی دیگر اضلاع میں گزشتہ ہفتے فضائی آلودگی نے ریکارڈ توڑ دیے، جو ڈبلیو ایچ او کے فضائی معیار کے رہنما اصولوں سے سو گنا زیادہ تھی۔
پاکستان میں یونیسیف کے نمائندے عبداللہ فاضل کا کہنا تھا کہ یہ اسموگ اتنی شدید ہےکہ خلا سے بھی نظرآتی ہے۔
عبداللہ فاضل نے کہا کہ میں چھوٹے بچوں کی فلاح و بہبود کے بارے میں انتہائی فکرمند ہوں، جو آلودہ ، زہریلی ہوا میں سانس لینے پر مجبور ہیں۔
اقوام متحدہ کے ادارہ برائے اطفال کا کہنا تھا کہ اسموگ سے پنجاب میں تقریباً ایک کروڑ ساٹھ لاکھ بچوں کی تعلیم متاثر ہوئی ہے۔ بچوں کی صحت اور تعلیم کے حق کی حفاظت کی جانی چاہیے۔
یونیسیف نے حکومت پاکستان سے مطالبہ کیا کہ وہ ہر بچے کیلئے ان حقوق کو پورا کرے اور اسموگ میں کمی کیلئے ہنگامی اقدامات کرے کیونکہ اس سے بچے اور حاملہ خواتین پر تباہ کن اثرات مرتب ہوں گے۔
