وزیراعلیٰ کےپی نے کہا ہے کہ ایک غیر آئینی اقدام ہوا، رات میں ڈکیتی ہوئی، ایسی حکومت نے عدلیہ پر حملہ کیا جس کے پاس مینڈیٹ نہیں۔
خیبر پختونخوا اسمبلی میں اظہار خیال کرتے ہوئے وزیراعلیٰ علی امین گنڈاپور نے کہا کہ ڈکیتی ہمیشہ رات میں ہوتی ہے، 26ویں آئینی ترمیم اشرافیہ کیلئے کی گئی، ہم ایسی ترامیم کو نہیں مانتے، اپنے بندے بٹھاکر فیصلے لیں گے تو ادارے آگے نہیں بڑھیں گے۔
علی امین گنڈاپور نے کہا کہ ایسی حکومت نےعدلیہ پرحملہ کیاجس کےپاس جائزمینڈیٹ نہیں، حکومت نے غیرآئینی ترامیم کیں، جو لوگ بانی کی پیٹھ پر چھرا گھونپنے کیلئے کھڑے تھے آج رات تک ان سب کے نام آجائیں گے۔
انھوں نے کہا کہ مشکل وقت آیا پارٹی پر، پتہ چل گیا کون بزدل اور ضمیرفروش تھا، غدار غدار ہے تاریخ میں غدار کو غدار ہی کہا جاتا ہے۔
علی امین نے کہا کہ غدارغدار ہے چاہے بزدلی سے غداری کرے یا بک کر کرے، کہتے ہیں مجبوری تھی، ووٹ کیوں دیا استعفیٰ کیوں نہیں دیا، پارٹی سے غداری کرنے والوں کو نہیں چھوڑیں گے۔
جو کہتا ہے مجبوری تھی اسے استعفیٰ دے دینا چاہیے تھا، قوم بھی حساب لے گی اور ہم بھی ان لوگوں کو چھوڑیں گے نہیں، ضمیر فروشی کرنے والوں کی پارٹی میں کوئی جگہ نہیں۔
انھوں نے کہا کہ بانی کے نام پر ووٹ لیکر دھوکا دینے والوں سے حساب لیں گے، ایسا نہیں ہوسکتا آپ سے کوئی سوال نہیں کرے گا، وقت آتا ہے سب کا۔
دریں اثنا کے پی اسمبلی نے پولیس ترمیمی بل 2024 کی منظوری دیدی، اس حوالے سے وزیراعلیٰ کےپی علی امین گنڈاپور کا کہنا تھا کہ ہماری پولیس کی بے پناہ قربانیاں ہیں، ہم اپنی پولیس کے ساتھ کھڑے ہیں، پولیس حکام سے بات کرکےبل لائے ہیں۔
