اسلام آباد : عالمی مالیاتی ادارے آئی ایم ایف نے پاکستان میں رواں مالی سال کے دوران بے روزگاری کی شرح8 فیصد رہنے کا امکان ظاہر کیا ہے۔
اس حوالے سے جاری آئی ایم ایف اعلامیہ میں کہا گیا ہے کہ رواں مالی سال پاکستان میں بےروزگاری کی شرح8فیصد رہنے کی توقع ہے۔
اعلامیہ کے مطابق گزشتہ مالی سال پاکستان میں بےروزگاری کی شرح8.5فیصد تھی جبکہ رواں مالی سال محصولات اور گرانٹس جی ڈی پی کے12.5فیصد رہ سکتی ہیں۔
اس کے علاوہ گزشتہ مالی سال محصولات اور گرانٹس جی ڈی پی کے11.4فیصد تھیں، رواں مالی سال بجٹ خسارہ جی ڈی پی کے 7.5 فیصد رہنے کا امکان ہے، گزشتہ مالی سال بجٹ خسارہ جی ڈی پی کے7.8فیصد تھا۔
آئی ایم ایف اعلامیہ میں کہا گیا ہے کہ رواں مالی سال کرنٹ اکاؤنٹ خسارہ جی ڈی پی کے0.8فیصد تک رہ سکتا ہے جبکہ گزشتہ مالی سال پاکستان کا کرنٹ اکاؤنٹ خسارہ جی ڈی پی کے0.7فیصد تھا۔
