نیویارک : اقوام متحدہ نے پاکستان میں موجود افغان مہاجرین کیلئے ہیلپ لائن قائم کردی، جو آج سے باقاعدہ پشاور سے کام کا آغاز کرے گی۔
تفصیلات کے مطابق پاکستان سے افغان مہاجرین کی واپسی کا طریقہ کار تبدیل کردیا گیا، اقوام متحدہ کے ادارہ برائے مہاجرین نے ہدایت نامہ جاری کردیا اور پاکستان میں موجود افغان مہاجرین کے لئے موبائل ہیلپ لائن بھی قائم کردی گئی ہے۔
ادارے نے پاکستان بھر میں مختلف موبائلز نمبرز جاری کئے ہیں، یو این ایچ سی آر کا کہنا ہے کہ افغان مہاجرین وطن واپسی سے متعلق ٹیلی فون کرکے پہلے معلومات حاصل کریں، ادارے کی جانب سے تاریخ دیئے جانے کے بعد مہاجرین وقت کی پابندی کریں اور سامان کے ہمراہ دفتر آئیں۔
مزید پڑھیں : عالمی ادارہ مہاجرین کا افغان مہاجرین کی واپسی کیلئے پرکشش مراعات کا اعلان
اس سے قبل عالمی ادارے یو این ایچ سی آر نے پاکستان میں رجسٹرڈ افغان مہاجرین کو وطن واپسی کی ترغیب دینے کیلئے پرکشش مراعات دینے کا اعلان کردیا ہے، یو این ایچ سی آر کا کہنا تھا کہ رجسٹرڈ افغان مہاجرین جو رضاکارانہ طور پر اپنے وطن واپس جانے کے خواہاں ہو، انہیں اضافی تین سو پچاس ڈالر دیئے جائیں گے۔
واضح رہے کہ وزارتِ داخلہ نے افغان مہاجرین کی واپسی کی مدت میں چھ ماہ کی توسیع کی ہے۔
مزید پڑھیں : رجسٹرڈ افغان مہاجرین کے قیام میں چھ ماہ توسیع کی منظوری
تاہم خیبر پختنوخواہ کی حکومت نے اس فیصلے کو مسترد کرتے ہوئے وزارت داخلہ سے افغان مہاجرین کی فوری واپسی کیلئے موثر اقدام کرنے کا مطالبہ کیا ہے ۔