متحدہ عرب امارات (یو اے ای) میں سرکاری افرادی قوت کے وفاقی ادارے کی جانب سے جمعہ 29 ستمبر 12 ربیع الاول کے موقع پر پورے ملک میں عام تعطیل کا اعلان کردیا گیا ہے۔
بین الاقوامی خبر رساں ادارے کی رپورٹ کے مطابق وفاقی ادارے کی جانب سے جاری کردہ بیان میں کہا گیا ہے کہ 2023 کے حوالے سے امارات میں سرکاری اور پرائیویٹ سیکٹرز کے لیے منظور شدہ سرکاری تعطیلات کے مطابق جمعہ 29 ستمبر 2023 کو ’مولد نبوی‘ کی عام تعطیل ہوگی۔
وفاقی ادارے نے متحدہ عرب امارات (یو اے ای) کی قیادت، حکومت، عوام، عربوں اور امت مسلمہ کو میلاد النبی صلی اللہ علیہ وآلہ وسلم کی مبارکباد بھی دی ہے۔
دوسری جانب متحدہ عرب امارات میں فضائی ٹکٹ 50 فیصد سے زیادہ سستے ہوگئے جس کے سبب مسافروں کی تعداد میں نمایاں اضافہ ہوا ہے۔
اس حوالے سے یواے ای کی ٹریولنگ ایجنسیوں کا کہنا ہے کہ ماہ رواں ستمبر کے دوران گزشتہ مہینوں کے مقابلے میں فضائی ٹکٹوں میں پچاس فیصد سے زیادہ رعایت دی گئی۔
عرب ذرائع ابلاغ کے مطابق ٹریولنگ ایجنسیوں نے توقع ظاہر کی ہے کہ سستے ٹکٹوں کا سلسلہ اکتوبر میں بھی جاری رہے گا۔ ٹکٹ سستے ہونے سے سفر کرنے والوں کی تعداد میں 20 فیصد سے زیادہ اضافہ ریکارڈ کیا گیا۔
ایجنسیوں کے منتظمین نے بتایا کہ ان دنوں زیادہ تر امارات سے بیرون ملک سفر کرنے والے نوجوان اور خاندان ہیں۔ عام طور پر لوگ قریب ترین اور پُرفضا مقامات پرجانا پسند کررہے ہیں۔
