خیبرپختونخوا کی سب سے بڑی یونیورسٹی جامعہ پشاور مالی بحران کے باعث ملازمین کی تنخواہیں اور پنشن کی ادائیگی سے قاصر ہے۔
ذرائع کے مطابق سنگین مالی بحران نے خیبرپختون خوا کی بیشتر جامعات کو جکڑ رکھا ہے، سرکاری یونیورسٹیاں ملازمین کی تنخواہیں اور پنشن کی ادائیگی نہیں کر پارہی ہیں ان میں کے پی کے کی سب سےبڑی یونیورسٹی جامعہ پشاور بھی شامل ہے۔
یونیورسٹی ذرائع کے مطابق ایچ ای سی کی جانب سے بجٹ پرکٹ لگنے سے یونیورسٹی کو مالی مشکلات درپیش ہیں، فنڈز کی کمی کے باعث جاری منصوبوں کو بھی روک دیاگیا ہے۔
ایڈیشنل خزانچی مظہراللہ نے میڈیا کو بتایا کہ یونیورسٹی کو350ملین روپےخسارےکاسامناہے، یونیورسٹی انتظامیہ کو تنخواہوں اورپنشن کیلئےماہانہ 30کروڑدرکارہیں اب ملازمین کی تنخواہیں طلبہ کی فیسیں جمع کرنےسےمشروط ہے۔
واضح رہے کہ پشاور یونیورسٹی میں 15 ہزار سے زائد طلبہ زیر تعلیم ہیں اور یہاں ملازمین کی تعداد تقریبا دو ہزار ہے۔