ایران پر حملے سے قبل اعلیٰ ترین امریکی اور اسرائیلی حکام میں ٹیلی فون کال پر ناخوشگوار بات چیت ہوئی جس میں کہا گیا کہ اسرائیل دو ہفتوں کی مہلت کا انتظار نہیں کرنا چاہتا۔
غیر ملکی میڈیا رپورٹ کے مطابق ایران پر حملے سے قبل اعلیٰ اسرائیلی اور امریکی حکام کے درمیان ٹیلی فون پر رابطہ ہوا جس میں اسرائیل کی جانب سے کہا گیا کہ وہ ایران کے جوہری مراکز پر جلد حملہ کرنا چاہتا ہے اور وہ دو ہفتے انتظار نہیں کرے گا۔
رپورٹ کے مطابق اس ٹیلی فون کال پر بات چیت میں اسرائیلی وزیرِ اعظم بنیامین نیتن یاہو، وزیر دفاع اسرائیل کاتز اور فوجی سربراہ ایال زامیر شامل تھے۔
اسرائیلی حکام نے ضد کی کہ ایران پر حملے کے لیے مزید انتظار نہیں کر سکتے، امریکا فوری کارروائی نہیں کرسکتا تو اسرائیل اکیلے ہی ایرانی فردو نیوکلیئر پلانٹ پر حملہ کر دے گا۔
ایران، اسرائیل اور امریکی تنازع سے متعلق تمام خبریں جاننے کے لیے کلک کریں
خبر ایجنسی کی رپورٹ کے مطابق امریکی حکومت اس معاملے پر تقسیم کا شکار تھی، نائب صدر جے ڈی وینس نے ٹیلی فون کال پر گفتگو کے دوران مؤقف اختیار کیا کہ امریکا کو اس جنگ میں شریک نہیں ہونا چاہیے۔
امریکی نائب صدر نے یہ بھی کہا کہ اسرائیل ہمیں جنگ میں گھسیٹ رہا ہے، امریکی وزیرِ دفاع پیٹ ہیگستھ بھی کال میں شریک تھے، رائٹرز اس بات کی تصدیق نہیں کر سکا کہ مزید اور کون اس گفتگو میں شریک تھا۔
