اقوام متحدہ نے غزہ میں انسانی بحران پر شدید تشویش کا اظہار کیا ہے۔
اقوام متحدہ کی ریلیف ایجنسی اُنروا کا کہنا ہے غزہ میں اسرائیلی محاصرے کے باعث خوراک کی شدید قلت پیدا ہوگئی ہے، پانچ سال سے کم عمر کے 60 ہزار بچے غذائی قلت کا شکار ہیں۔
اُنروا کی ڈائریکٹر جولیٹ توما کا کہنا ہے غزہ قحط کے دہانے پر ہے، بیکریاں بند ہوچکی ہیں، بھوک تیزی سے پھیل رہی ہے، تمام بنیادی اشیاء ختم ہورہی ہیں، بچے بھوکے سو رہے ہیں۔
اسرائیلی میڈیا نے صیہونی حکومت کے خفیہ منصوبے کا بھانڈا پھوڑ دیا
اقوام متحدہ کی مشرق وسطیٰ کیلئے خصوصی رابطہ کاراسگرڈ کاگ کا کہنا ہے حالات نہ صرف عام شہریوں بلکہ امدادی کارکنوں کیلئے بھی خوفناک ہوچکے ہیں۔
اقوام متحدہ نے فوری جنگ بندی اورانسانی امداد کی بلاتعطل فراہمی کا مطالبہ کیا ہے تاکہ مزید جانی نقصان اور غزہ کے شہریوں کو ناقابل تلافی نقصان سے بچایا جاسکے۔
اقوام متحدہ کا کہنا ہے کہ 2 مارچ کے بعد سے امدادی قافلوں کی رسائی تقریبا بند ہو چکی ہے، جس سے اسپتالوں کو ایندھن، خوراک کی تقسیم اور امدادی کارکنوں کی نقل و حرکت میں رکاوٹ پیدا ہوئی ہے۔
