کراچی: سندھ ہائی کورٹ نے آئی جی سندھ کی تبدیلی سے متعلق درخواست کی سماعت کے دوران ریمارکس دیے کہ اسٹیبلشمنٹ ڈویژن کے جواب تک کلیم امام ہی آئی جی سندھ رہیں گے۔
تفصیلات کے مطابق سندھ ہائی کورٹ نے آئی جی سندھ کی تبدیلی سے متعلق درخواست کی سماعت کے دوران ریمارکس دیے کہ سندھ ہائی کورٹ پہلے فیصلہ دے چکی ہے، صوبہ اور وفاق مشاورت کے بعد آئی جی کوتبدیل کر سکتے ہیں۔
عدالت نے ریمارکس دیے کہ اسٹیبلشمنٹ ڈویژن کے جواب تک کلیم امام ہی آئی جی سندھ رہیں گے، قانون میں آئی جی سندھ کے عہدے کی مدت 3 سال ہے،نئے آئی جی کی تعیناتی قانون کے مطابق کی جائے۔
سندھ ہائی کورٹ نے ریمارکس دیے کہ سندھ حکومت کا آئی جی تبدیلی کے خط کا ابھی تک جواب نہیں ملا، اگر شام کو وفاق کا جواب آجاتا ہے تو کر دیں۔ عدالت نے وفاق اور صوبائی حکومت کو 28 جنوری کے لیے نوٹس جاری کر دیے۔
یاد رہے کہ گزشتہ ہفتے سندھ حکومت نے آئی جی سندھ کو ہٹانے کا نوٹیفکیشن جاری کیا تھا، صوبائی حکومت نے نئے آئی جی کے لیے وفاقی حکومت کو خط بھی لکھا تھا۔