پنجاب میں الیکشن سے متعلق سپریم کورٹ کے فیصلے پر وزیراعظم شہباز شریف کی زیر صدارت حکومتی لیگل کمیٹی کا مشاورتی اجلاس ہوا۔
اے آر وائی نیوز کے مطابق سپریم کورٹ کی جانب سے پنجاب میں 14 مئی کو الیکشن کرانے کے سپریم کورٹ کے فیصلے بعد وزیراعظم شہباز شریف کی زیر صدارت حکومتی قانونی کمیٹی کا مشاورتی اجلاس ہوا جس میں وزیر قانون اعظم نذیر تارڑ، وزیراعظم کے معاون خصوصی عطا تارڑ، اکرم شیخ اور اٹارنی جنرل شریک ہوئے۔
ذرائع نے بتایا کہ اجلاس میں سپریم کورٹ کے مذکورہ فیصلے کے خلاف آئینی اور قانونی آپشنز پر غور کیا گیا اور فیصلے پر عملدرآمد نہ کرنے کی صورت میں بعد کی صورتحال پر بھی غور کیا گیا۔
ذرائع کے مطابق اجلاس میں الیکشن کمیشن کی جانب سے آئندہ کی حکمت عملی پر بھی مشاورت کی گئی۔
دوسری جانب وزیراعظم نے اتحادی جماعتوں کے پارلیمانی رہنماؤں کا اجلاس بھی آج طلب کر لیا۔ ذرائع کے مطابق آج شام وزیراعظم ہاؤس میں ہونے والے اجلاس میں سپریم کورٹ کے فیصلے کے بعد کی صورتحال پر مشاورت کی جائے گی اور پارلیمنٹ میں حکومتی مؤقف کو بھرپور اجاگر کرنے کی حکمت عملی پر غور ہوگا۔
واضح رہے کہ سپریم کورٹ نے گزشتہ روز پنجاب الیکشن التوا کیس کا فیصلہ سناتے ہوئے الیکشن کمیشن کے 22 مارچ کے فیصلے کو کالعدم قرار دیا تھا اور الیکشن شیڈول میں معمولی ردوبدل کراتے ہوئے پنجاب میں 14 مئی کو الیکشن کرانے کا حکم دیا تھا۔
سپریم کورٹ نے اپنے فیصلے میں وفاقی حکومت اور متعلقہ اداروں کو الیکشن کے حوالے سے تمام معاونت فراہم کرنے کا بھی حکم دیا گیا تھا۔
عدالت عظمیٰ کے اس فیصلے کے بعد وفاقی کابینہ کا ایک اجلاس ہوا تھا جس میں سپریم کورٹ کے اس فیصلے کو ماننے سے انکار کرتے ہوئے اسے مسترد کر دیا تھا۔
