بھارت میں بیوی نے بہن کو شادی میں تحائف دینے کے تنازع پر شوہر کو قتل کردیا۔
بھارتی میڈیا رپورٹس کے مطابق افسوسناک واقعہ ریاست اترپردیش کے گاؤں بارہ بنکی کے قریب پیش آیا، چندر پرکاش مشرا کو اہلیہ نے بھائیوں کے ساتھ مل کر قتل کردیا کیونکہ وہ شادی میں بہن کو سونے کی انگوٹھی اور ٹی وی دینے پر ناراض تھی۔
35 سالہ نوجوان اپنی بہن کو قیمتی تحائف دینا چاہتا تھا جس کی شادی 26 اپریل کو طے تھی۔
چندرپرکاش کی بیوی شوہر کے تحائف دینے کے ارادے پر ناراض تھی جس کی وجہ سے جوڑے کے درمیان جھگڑا بھی ہوا تھا۔
پولیس کے مطابق اہلیہ نے اپنے بھائیوں کو شوہر کو سبق سکھانے کے لیے بلایا اس دوران ملزمان نے چندر پرکاش کو ڈنڈوں سے تشدد کا نشانہ بنایا۔
چندر پرکاش کو شدید زخمی حالت میں اسپتال منتقل کیا گیا جہاں وہ زخموں کی تاب نہ لاتے ہوئے دم توڑ گیا۔
پولیس کا کہنا ہے کہ ملزمہ اور اس کے بھائیوں سمیت 5 افراد کو گرفتار کرکے واقعے کا مقدمہ درج کرلیا گیا ہے۔
