کراچی: اردو یونیورسٹی کے عبدالحق کیمپس میں اساتذہ کی جانب سے کلاسز کا بائیکاٹ تیسرے روز بھی جاری رہا۔
تفصیلات کے مطابق انجمن اساتذہ وفاقی اردو یونیورسٹی (عبدالحق کیمپس) کی جانب سے کلاسز کا بائیکاٹ جاری ہے، اساتذہ نے اپنے مطالبات کی منظوری کے لیے تیسرے روز بھی احتجاج کیا۔
انجمن اساتذہ کی جانب سے تنخواہوں میں تاخیر، ترقی پانے والے اساتذہ کی فوری پے فکسیشن، اور 2021 کے سلیکشن بورڈ میں کامیاب لیکچرار کے تقررناموں کے اجرا کے لیے احتجاج کیا جا رہا ہے۔
اساتذہ کا مطالبہ ہے کہ باقی ماندہ شعبوں کے سلیکشن بورڈز کی تکمیل، ہاؤس سیلنگ کے بقایا جات کی ادائیگی، جز وقتی اساتذہ (صبح و شام) کی گزشتہ ایک سال کی ادائیگی، اور ریٹائرڈ اساتذہ کے بقایا جات کی فوری ادائیگی کی جائے۔
دوران احتجاج کلاسز کا مکمل بائیکاٹ کیا گیا اور اساتذہ نے کالی پٹیاں باندھ کر کیمپس گراؤنڈ میں احتجاجی دھرنا دیا۔
اساتذہ کے نمائندوں کا کہنا ہے کہ مطالبات کی منظوری تک کلاسز کا بائیکاٹ اور احتجاج جاری رہے گا۔
