یوروگوئے کے سابق صدر اور عالمی سطح پر دنیا کے غریب ترین صدر حوزے موجیکا 89 برس کی عمر میں چل بسے۔
غیر ملکی میڈیا رپورٹ کے مطابق سابق گوریلا لیڈر اور دنیا کے غریب ترین صدر حوزے موجیکا انتقال کر گئے، انہیں سادہ زندگی گزرنے کے باعث عالمی سطح پر دنیا کے غریب ترین صدر کے طور پر جانا جاتا ہے۔
رپورٹ کے مطابق حوزے موجیکا تنخواہ کا بیشتر حصہ خیرات کر دیتے تھے اور ایک سادہ گھر اور گاڑی رکھتے تھے۔
نواسی برس کے حوزے موجیکا کے انتقال کی خبر یوروگوائے کے موجودہ صدر یاماندو اورسی نے سوشل میڈیا پر دی، انہوں نے لکھا حوزے موجیکا نے جو کچھ ہمیں دیا، اور اپنے عوام سے جو گہری محبت کی، اس کیلئے شکر گزار ہیں۔
رپورٹ کے مطابق یوروگوئے کے سابق صدر حوزے موجیکا غذائی نالی کے کینسر میں مبتلا تھے، وہ کرپشن ، دھوکے اور فراڈ سے پاک عوام کے حقیقی خادم تھے۔ ان کا کہنا تھا سیاست، کتابوں سے محبت اور زمین سےجڑے رہنے کا جذبہ انہیں اپنی والدہ سے ورثے میں ملا۔
یوروگوئے ایک چھوٹا سا ملک ہے جس کی آبادی محض 34 لاکھ ہے لیکن موجیکا کی عالمی شہرت غیرمعمولی تھی، وہ 2010 سے 2015 تک یوروگوئے کے صدر رہے، انہوں نے اپنی سیاسی زندگی کا آغاز روایتی نیشنل پارٹی سے کیا، جو بعد ازاں ان کی حکومت کی مرکزِ راست (centre-right) اپوزیشن بنی۔
