نیویارک: امریکا کی دو ریاستوں میں عائد کرونا کی پابندیاں ختم کرنے کا اعلان کردیا گیا۔
بین الاقوامی میڈیا رپورٹ کے مطابق امریکی ریاست ٹیکساس کی حکومت نے کرونا پابندیاں ختم کرنے کا اعلان کرتے ہوئے کہا کہ آئندہ ہفتے سے کاروبار مکمل طور پر بحال کردیا جائے گا جبکہ ریاست مسی سپی کی حکومت نے کل سے تمام کاروباری مراکز کھولنے کا اعلان کردیا۔
دوسری جانب امریکا میں وبائی امراض اور روک تھام کے مرکز سی ڈی سی کے ڈائریکٹر نے کرونا پابندیاں ختم کرنے پر تشویش کا اظہار کرتے ہوئے کہا کہ ’ہم نے سخت اور بھرپور اقدامات کی وجہ سے کرونا کے خلاف جو کامیابی حاصل کی وہ سب ضائع ہونے کا خدشہ ہے‘۔
اُن کا کہنا تھا کہ کرونا کے انسداد اور روک تھام کے لیے ہم نے سخت محنت کی تھی، جو کامیابی ہمیں گزشتہ چند ماہ میں ملی اب ہم اُس سے محروم ہوسکتے ہیں۔
قبل ازیں امریکی صدر جوبائیڈن نے اعلان کیا ہے کہ آئندہ برس سے کرونا کی پابندیاں ختم ہوجائیں گی جس کے بعد زندگی معمول کے مطابق بحال ہوجائے گی۔
