اردن میں امریکی فوجی اڈے پر ڈرون حملے کے رد عمل میں امریکی فوج نے عراق اور شام میں 85 مقامات پر فضائی حملے کئے، جس کے باعث متعدد شہریوں کے جاں بحق اور زخمی ہونے کی اطلاعات سامنے آرہی ہیں۔
بین الاقوامی خبر رساں ادارے کی رپورٹ کے مطابق امریکی حکام نے ایران نواز ملیشیا پر مزید حملوں کی دھمکی دی ہے اور کہا ہے کہ حملے امریکی اہلکاروں کو ہلاک کرنے کے جواب میں کیے گئے۔
امریکی صدر جو بائیڈن کا کہنا تھا کہ ہمارا ردعمل آج سے شروع ہوا ہے، اور اس کا سلسلہ مستقبل میں بھی ہمارے منتخب کردہ وقت اور مقام پر جاری رہے گا۔
یاد رہے کہ چند روز قبل اردن میں امریکی فوجی اڈے پر ڈرون حملے کے نتیجے میں 3 امریکی فوجی ہلاک اور متعدد زخمی ہوگئے تھے۔
اردن کے ڈرون حملے میں 3 امریکی فوجی ہلاک
امریکی حکام کا ملکی نشریاتی ادارے سی این این کہنا تھا کہ ڈرون حملے میں 3 فوجی ہلاک اور 2 درجن سے زائد اہلکار زخمی ہوئے ہیں۔
واضح رہے کہ غزہ میں اسرائیلی جارحیت کے آغاز کے بعد سے مشرق وسطیٰ میں یہ امریکی فوجیوں کی ہلاکت کا یہ پہلا معاملہ سامنے آیا تھا۔
