اسلام آباد : امریکی سفیر ڈونلڈ بلوم نے ورلڈکپ میں پاکستان کرکٹ ٹیم کیلئے نیک خواہشات کا اظہار کرتے ہوئے کہا امید ہے پاکستان کیلئے یہ ایونٹ یادگار ثابت ہوگا۔
تفصیلات کے مطابق امریکی سفیر ڈونلڈ بلوم نے سوشل میڈیا ایکس پراپنے پیغام میں کہا کہ امریکاپہلی بارٹی 20ورلڈکپ کی میزبانی کررہا ہے، یقین ہے ٹی 20 ورلڈ کپ میں دلچسپ مقابلے دیکھنے کو ملیں گے۔
امریکی سفیر کا کہنا تھا کہ ورلڈکپ کیلئےروانگی سےقبل پاکستان ٹیم کی میزبانی کی، کپتان بابر اعظم اور ٹیم کیلئےنیک خواہشات ہیں، پاکستانی ٹیم سے بیٹنگ اور بولنگ ٹپس بھی لیں۔
خیال رہے پاکستان کرکٹ ٹیم ورلڈکپ میں شرکت کیلیے ڈیلس پہنچ گئی، کھلاڑی دو روز آرام کے بعد تین جون سے تیاریوں کا آغاز کریں گے۔
ڈیلس کے گرینڈ پریری اسٹیڈیم میں پریکٹس کریں گے، قومی ٹیم میگا ایونٹ میں اپنا پہلا میچ چھے جون کو میزبان امریکا سے کھیلے گی۔
پاکستان کےگروپ میں بھارت، امریکا، کینیڈا اور آئرلینڈ کی ٹیمیں شامل ہیں۔
