یمن کے دارالحکومت صنعا میں حوثیوں کے ٹھکانوں پر امریکا نے حملہ کردیا۔
غیر ملکی میڈیا رپورٹ کے مطابق امریکی حملوں میں حوثیوں کے کمانڈ اینڈ کنٹرول کی عمارت اور میزائل تنصیبات کو نشانہ بنایا گیا، حملے میں باغیوں کے ڈرونز تباہ کرنے کا دعویٰ بھی کیا گیا ہے۔
امریکی سینٹرل کمانڈ کے مطابق ہفتے کو یمن کے حوثی باغیوں کے زیرِ قبضہ دارالحکومت صنعا میں حملے کیے گئے، جن میں ایک میزائل سمیت کمانڈ اینڈ کنٹرول سینٹر کو نشانہ بنایا گیا۔
امریکی سینٹرل کمانڈ کے بیان میں کہا گیا کہ آپریشن کے دوران امریکی فورسز نے بحیرہ احمر کے اوپر حوثی باغیوں کے کئی ڈرونز اوراینٹی شپ کروز میزائل کو بھی مار گرایا۔
گذشتہ روز حوثیوں نے تل ابیب پر ڈرون حملہ کیا تھا، حوثیوں کی جانب سے تل ابیب پر حملہ صنعا اور الحدیدہ پر اسرائیلی فضائی حملوں کے بعد کیا گیا تھا۔
یاد رہے کہ یمن سے حوثیوں نے اسرائیلی دارالحکومت تل ابیب پر میزائل حملہ کیا تھا جس کے نتیجے میں 16 افراد زخمی ہوگئے تھے۔
