راولپنڈی : آرمی چیف جنرل سید عاصم منیر سے امریکی سینٹ کام کمانڈر نے ملاقات کی ، جس میں جنرل مائیکل ایرک کوریلا نے انسداد دہشت گردی،علاقائی امن ،فلڈ ریلیف میں پاکستان کی کوششوں کو سراہا۔
تفصیلات کے مطابق پاک فوج کے شعبہ تعلقات عامہ آئی ایس پی آر کی جانب سے جاری بیان میں کہا گیا ہے کہ امریکی سینٹرل کمانڈ کے کمانڈر جنرل مائیکل ایرک کوریلا نے جی ایچ کیو راولپنڈی کا دورہ کیا۔
آئی ایس پی آر کا کہنا تھا کہ جہاں انھوں نے یادگار شہداء پر پھول رکھے، پاک فوج کے چاق چوبند دستے نے گارڈ آف آنر پیش کیا۔
بعد ازاں کمانڈرسینٹ کام نے آرمی چیف جنرل سید عاصم منیر سے ملاقات کی، جس کے بعد وفود کی سطح پر بات ہوئی۔
ترجمان نے بتایا کہ ملاقات میں باہمی دلچسپی کے امور، علاقائی استحکام اور سلامتی کی صورتحال سمیت دفاعی اور سیکیورٹی تعاون بالخصوص فوجی تعلقات پر تبادلہ خیال کیا گیا۔
آئی ایس پی آر کے مطابق جنرل مائیکل ایرک کوریلا نے دہشت گردی کیخلاف جنگ میں پاکستان کی کامیابیوں، سیلاب سے ریلیف اور علاقائی امن کیلئے کوششوں کا اعتراف کیا۔
پاک فوج کے ترجمان کا کہنا تھا کہ امریکی وفد طورخم کا دورہ بھی کرے گا، جہاں انہیں انسداد دہشتگردی اور پاک افغان بارڈر پر بارڈر مینیجمنٹ کے امور سے آگاہ کیا جائے گا۔
