واشنگٹن: امریکی صدارتی انتخاب کے نتائج مکمل ہو گئے، ڈونلڈ ٹرمپ نے تمام 7 سوئنگ ریاستوں میں کامیابی حاصل کر لی۔
امریکی میڈیا رپورٹس کے مطابق ٹرمپ نے تمام 7 سوئنگ ریاستوں میں کامیابی حاصل کر لی ہے، چار روز بعد سوئنگ ریاست ایریزونا کے انتخابی نتائج بھی آ گئے، جس میں ٹرمپ کو برتری حاصل رہی، 538 میں سے ڈونلڈ ٹرمپ کو 312 اور کاملا ہیرس کو 226 الیکٹرول ووٹ ملے۔
ڈونلڈ ٹرمپ 20 جنوری کو امریکا کے 47 صدر کے عہدے کا حلف اٹھائیں گے۔
ادھر امریکا کے نو منتخب صدر ٹرمپ نے حکومت سازی کے لیے پیش رفت کرتے ہوئے کئی ناموں پر غور شروع کر دیا ہے، ایلون مسک، رابرٹ کینیڈی جونیئر اور وویک راماسوامی کے نام فائنل کر لیے گئے ہیں۔
وزیر خارجہ کے لیے سینیٹر مارکو روبیو، وزیر دفا ع کے لیے آرمڈ سروسز کمیٹی کے چیئرمین مائیک راجر کے نام پر غور کیا جا رہا ہے، فلوریڈا میں ٹرمپ کی رہائش گاہ پر نئی انتظامیہ کے لیے انٹرویوز کا سلسلہ بھی جاری ہے۔
ٹرمپ پہلے ہی سوزی وائلز کو چیف آف اسٹاف مقرر کر کے تاریخ رقم کر چکے ہیں، پاکستانی نژاد ری پبلکن ساجد تارڑ نے کہا ہے کہ ٹرمپ اپنی کابینہ میں ایسے لوگوں کو شامل کریں گے جو امریکا میں کرپشن کے خاتمے کے لیے کوشاں رہیں گے۔
