واشنگٹن: امریکی صدر جوبائیڈن نے اعلان کیا ہے کہ 20 جنوری 2025 کو پُرامن طور پر اقتدار کی منتقلی ہو جائے گی۔
صدارتی انتخاب میں کاملا ہیرس کی شکست کے بعد قوم سے اپنے پہلے خطاب میں جوبائیڈن نے کہا کہ کاملا ہیرس نے بہترین انتخابی مہم چلائی جس پر فخر کرتے ہیں۔
جوبائیڈن نے کہا کہ امریکی قوم نے جو انتخاب کیا ہے ہم اس کو قبول کرتے ہیں، امریکا کا الیکٹورل سسٹم شفاف ہے عوام کا فیصلہ قبول کرتے ہیں، امریکی انتظامیہ نومنتخب صدر ڈونلڈ ٹرمپ کی ٹیم کے ساتھ ملک کی ترقی کیلیے کام کرے گی۔
انہوں نے مزید کہا کہ ہم نے تاریخی صدارت کی اور اب امریکا کی مضبوط معیشت چھوڑ کر جا رہے ہیں، انتخابات میں شکست کا مطلب یہ نہیں کہ ہم ہار مان لیں گے بلکہ جمہوریت میں عوام کی رائے ہمیشہ مقدم ہوتی ہے۔
گزشتہ روز جوبائیڈن نے ڈونلڈ ٹرمپ کو فون کر کے صدارتی انتخاب میں کامیابی پر مبارکباد پیش کی تھی اور انہیں ملاقات کیلیے وائٹ ہاؤس آنے کی دعوت بھی دی تھی۔
امریکی صدر نے نائب صدر و امیدوار ڈیموکریٹک پارٹی کاملا ہیرس کو بھی فون کیا تھا۔
قبل ازیں، کاملا ہیرس نے شکست کے بعد ہاورڈ یونیورسٹی سے خطاب میں انتخابی مہم میں ساتھ دینے والوں کا شکریہ ادا کرتے ہوئے کہا تھا کہ ہمیں نتائج کھلے دل سے تسلیم کرنے چاہئیں۔
ان کا کہنا تھا کہ الیکشن میں ہار مانتی ہوں، اقتدار کی پر امن منتقلی یقینی بنانے کیلیے پرعزم ہیں، ہم ہمت نہیں ہاریں گے ہماری جدوجہد جاری رہے گی اور ہماری جدوجہد امریکا کے بہتر مستقبل کیلیے ہے۔
