واشنگٹن : امریکا نے کہا ہے کہ بھارت کی جانب سے سیارے کو نشانہ بنانے کے تجربے کا جائزہ لے رہے ہیں، سیارہ شکن ہتھیاروں کے تجربات خلاف میں افراتفری کا سبب بن سکتے ہیں۔
تفصیلات کے مطابق بھارت کا جنگی جنون زمین کی حدوں سے نکل کرخلاتک پہنچ گیا، بھارت کے سیارہ شکن میزائل تجربے کے بعد امریکا نے خبردارکیا ہے کہ سیارہ شکن ہتھیارکے تجربات خلامیں افراتفری پھیلا سکتے ہیں۔
نگراں امریکی وزیر دفاع پیٹرک شینیہن نے میڈیا سے گفتگومیں کہا بھارتی تجربے کا جائزہ لے رہے ہیں، خلا کو برباد نہ کریں۔
امریکی خلائی ادارے ناسا نے بھی بھارتی تجربے کے بعد ملبے کوخطرناک قراردیا ہے۔
مزید پڑھیں : بھارت کاخلامیں تجربہ عالمی قوانین کی خلاف ورزی ہے، پاکستان
دوسری جانب پاکستان نے خلامیں فوجی تجربات کی مخالفت کرتے ہوئے تمام ممالک سے ذمہ داری کا ثبوت دینے پرزوردیا، ترجمان دفترخارجہ کا کہنا تھا بھارت کاخلامیں تجربہ عالمی قوانین کی خلاف ورزی ہے، خلاتمام انسانوں کی مشترکہ میراث ہے ، ایسے تجربات سے اقوام عالم کوخطرات لاحق ہوں گے۔
بھارتی وزیراعظم نریندرمودی نے بھارت کیجانب سے خلامیں سیارے کونشانہ بنانے کا اعلان کرتے ہوئے کہا تھا ہمارے سائنسدانوں نے خلا میں 300کلومیٹر کے فاصلے (ایل ای او) میں محض تین منٹ میں ’مشن شکتی‘کو انجام دیتے ہوئے ایک لائیو سیٹلائٹ کومارگرانے کا مظاہرہ کیا۔
جس کے بعد بھارتی اپوزیشن نے الیکشن سے چند روزپہلے خلائی میزائل کے تجربے کے اعلان پروزیراعظم مودی کوشدید تنقید کا نشانہ بناتے ہوئے اسے ووٹ حاصل کرنے کی کوشش قراردیا۔
واضح رہے 2007 میں چین نے خلاء میں موجود ایک ناکارہ موسمیاتی سٹیلائٹ کو تباہ کرکے ایسا ہی تجربہ کیا تھا ،جس سے مدار میں ملبے ایک بڑا بادل پیدا ہوا تھا، اس طرح کا ملبہ خلاء میں موجود مصنوعی سیاروں اور دیگر چیزوں کو نقصان پہنچ سکتا ہے۔
