واشنگٹن: امریکا نے ایران سے کاروبار کرنے والی چین کی کمپنی پر پابندیاں عائد کر دیں۔ چین کی کمپنی "ٹی پاٹ” ریفائنری پر پابندیاں محکمہ خزانہ کے دفتر برائے غیر ملکی اثاثہ جات کے کنٹرول (OFAC) نے جاری کیں۔
امریکی محکمہ خارجہ کے مطابق چینی کمپنی شینڈونگ شینگکسنگ کیمیکل نے ایران سے ایک ارب ڈالر سے زیادہ مالیت کے ایرانی خام تیل کی خریداری کی، صدر ٹرمپ ایران کی تیل کی غیر قانونی برآمدات بشمول چین کو صفر تک لے جانے کے لیے پرعزم ہیں۔
ترجمان نے کہا کہ امریکا ایران کے "شیڈو” بیڑے کے حصے کو چین کو ایرانی تیل کی ترسیل میں سہولت فراہم کرنے والی متعدد کمپنیوں اور جہازوں پر بھی پابندیاں عائد کر رہا ہے۔
صدر ٹرمپ کی جانب سے 4 فروری 2025 کو نیشنل سیکیورٹی صدارتی میمورنڈم جاری کرنے کے بعد سے چین میں قائم ریفائنری کے خلاف امریکا کی دوسری کارروائی ہے، ٹرمپ انتظامیہ کی ایران پر زیادہ سے زیادہ دباؤ کی مہم کے تحت تمام پابندیاں مکمل طور پر نافذ کی جائیں گی۔
ترجمان نے کہا کہ ایران عدم استحکام کی سرگرمیوں کو فنڈ دینے کے لیے تیل سے آمدنی حاصل کرنے کی کوشش کرتا ہے تو امریکا ایران اور اس کے تمام شراکت داروں کو جوابدہ ٹھہرائے گا، امریکا مزید چینی کمپنیوں اور جہازوں پر اضافی پابندیاں بھی عائد کرنے جارہا ہے۔
امریکی محکمہ خارجہ نے بتایا کہ ایرانی تیل خریدنے میں سہولت فراہم کرنے والی تمام کمپنییز اور بروکرخود کو سنگین خطرے میں ڈال رہے ہیں ایران کے تیل کی چین کو سپلائی روکنے کیلئے امریکا پر عزم ہے۔
