عراقی شہر کرکوک میں دہشت گرد تنظیم داعش کے ارکان کے خلاف سیکورٹی فورسز نے آپریشن کیا، اس دوران 2 خودکش حملہ آوروں کو واصل جہنم کردیا گیا۔
بین الاقوامی خبر رساں ادارے کی رپورٹ کے مطابق عراقی وزارت داخلہ کا کہنا ہے کہ کرکوک کے محلے پنجا علی کے قریب سیکورٹی فورسز نے ایک مشکوک گاڑی کا تعاقب کیا۔
بیان کے مطابق مشکوک گاڑی پر چھاپے کے دوران گاڑی میں موجود دہشت گرد تنظیم داعش کے 2 خودکش حملہ آور جسم پر بندھے بموں کے پھٹنے سے ہلاک ہو گئے۔
دوسری جانب ایرانی فورسز کی جانب سے بھی مختلف صوبوں میں کارروائیوں کے دوران داعش کے 14 دہشت گردوں کو حراست میں لے لیا گیا ہے۔
رپورٹ کے مطابق دہشت گردوں کی گرفتاریاں تہران، البروز، فارس اور خوزستان سے کی گئی ہیں۔
خبر ایجنسی کا اس حوالے سے کہنا ہے داعش خراسان سے تعلق رکھنے والے 7 دہشتگرد فارس اور باقی 7 دیگر تین صوبوں سے حراست میں لئے گئے ہیں۔
ٹرمپ فائرنگ واقعہ، ایف بی آئی کا اہم بیان
ایرانی وزارت انٹیلی جنس کے حوالے سے بتایا گیا ہے کہ ملزمان دہشتگرد حملے کے ارادے سے چند روز پہلے ایران میں داخل ہوئے تھے۔ حکام کے مطابق تحقیقات سے متعلق مزید تفصیلات بعد میں جاری کی جائیں گی۔
