The news is by your side.

منشیات کی کوالٹی چیک کرنے کے لیے پولیس کو طلب کرنے والا شخص گرفتار

امریکا میں ایک شخص نے پولیس کو کال کر کے نشہ آور آئس کا معیار چیک کرنے کے لیے کہا جس کے بعد پولیس نے اس شخص کے گھر پہنچ کر اسے گرفتار کرلیا۔

امریکی میڈیا کے مطابق ریاست فلوریڈا کے علاقے اسپرنگ ہل میں مقامی پولیس کو ایک کال موصول ہوئی، کال کرنے والے نے اپنا نام تھامس یوجین بتایا۔

تھامس نے کہا کہ اس نے گزشتہ رات بار میں ایک شخص سے میتھمفیٹامین یعنی آئس خریدی ہے اور وہ چاہتا ہے کہ پولیس چیک کرے کہ آیا وہ اصلی منشیات ہے یا نہیں۔

پولیس اس کے گھر پہنچی تو تھامس نے بتایا کہ اس نے گزشتہ رات بار میں ایک شخص سے اسے خریدا، اور اس وقت چکھنے پر اسے ٹھیک لگی لیکن اب یہ اسے نمک جیسی لگ رہی ہے۔

تھامس کا کہنا تھا کہ وہ عادی نشئی ہے اور باقاعدگی سے منشیات لیتا ہے، اور چاہتا کہ پولیس اسے ٹیسٹ کرے تاکہ لوگ اس جعلی نشے کو خرید کر اپنے پیسے نہ ضائع کریں۔

پولیس نے اسی وقت اس منشیات کا فیلڈ ٹیسٹ کیا جس میں پتہ چلا کہ یہ اصل آئس ہی ہے، اور اس کے بعد پولیس نے تھامس کو گرفتار کرلیا۔

تھامس پر منشیات کے استعمال اور گھر میں منشیات رکھنے کے چارجز عائد کیے گئے ہیں، ابتدا میں اسے سینے میں درد کی شکایت پر اسپتال لے جایا گیا تاہم ڈاکٹرز نے اسے صحت مند قرار دیا جس کے بعد پولیس نے تھامس کو حراستی مرکز منتقل کردیا۔

Comments

یہ بھی پڑھیں