کراچی: پاکستان میں امریکی مشن کے نائب سربراہ اینڈریو شوفر کی سربراہی میں امریکی وفد نے صوبہ سندھ کا دورہ کیا، جہاں انھوں نے امریکی حکومت کی مالی معاونت سے جاری پروگرامز کا جائزہ لیا۔
تفصیلات کے مطابق امریکی حکومت کی معاونت سے جاری پروگرامز کے تحت 2022 میں سیلابی تباہ کاریوں کے نتیجے میں صحت، تحفظ اور غذائی قلت سمیت دیگر چیلینجز سے نمٹنے کے لیے پاکستان کو مدد فراہم کی جا رہی ہے۔
امریکی حکومت کی جانب سے پاکستان کو 20 کروڑ ڈالرز کی مالی معاونت فراہم کی جا چکی ہے، جس کا مقصد پاکستان میں سیلاب متاثرین کی بحالی و امداد، سیلابی تباہی سے نمٹنے کی استعداد میں اضافہ اور غذائی تحفظ کو یقینی بنانا ہے۔
امریکی حکومت نے پاکستان میں سیلاب سے ہونے والے جانی و مالی نقصانات پر اظہارِ افسوس کرتے ہوئے سیلاب متاثرین کی بحالی میں بھرپور تعاون کا سلسلہ جاری رکھا ہوا ہے۔
اینڈریو شوفر نے امریکی حکام کے ہمراہ میرپور خاص میں قائم دیہی صحت مرکز کا دورہ کیا، جہاں اقوام متحدہ کا فنڈ برائے اطفال (UNICEF) صحت اور غذائی خدمات فراہم کرنے میں پیش پیش ہے، ان خدمات کے لیے یونیسیف کو امریکی ایجنسی برائے بین الاقوامی ترقی (USAID) کے ذریعے امریکی حکومت کی فنڈنگ حاصل ہے۔
اینڈریو شوفر نے یونیسیف کے نمائندگان سے ملاقات میں سیلاب سے متاثرہ علاقوں میں غذائی قلت سمیت دیگر مسائل پر گفتگو کی، جب کہ پاکستان میں صحت کے نظام پر سیلابی تباہی کے گہرے اثرات کو سمجھنے کے لیے مختلف پہلووٴں پر بھی تبادلہ خیال ہوا۔ انھوں نے سیلاب متاثرین کو فراہم کردہ بنیادی صحت کی خدمات، بشمول امریکی حکومت کی مالی معاونت سے غذائی اشیا کی تقسیم کا بھی جائزہ لیا۔
امریکی مشن کے نائب سربراہ اینڈریو شوفر نے گاوٴں جیئو کلوئی کا بھی دورہ کیا، جہاں یونیسیف کی جانب سے امریکا کی مالی معاونت سے موبائل کلینک کے ذریعے صحت وغذائی خدمات فراہم کی جا رہی ہیں۔
رپورٹ کے مطابق یونیسیف سیلاب سے متاثرہ آبادیوں کی بحالی و امداد کی خدمات میں مصروف عمل ہے، جب کہ صنفی بنیاد پر تشدد (GBV) کی روک تھام اور بچوں کے تحفظ سے متعلق شعور اجاگر کرنے کے لیے یونیسیف کلیدی کردار ادا کر رہا ہے۔
