ڈیووس: وزیرخارجہ شاہ محمود قریشی کا کہنا ہے کہ امریکی صدر ڈونلڈ ٹرمپ نے یقین دہانی کرائی ہے کہ وہ جلد پاکستان کا دورہ کریں گے، صدر ٹرمپ کے ساتھ امریکا میں ملاقات بہت مفید رہی۔
تفصیلات کے مطابق اے آر وائی نیوز سے خصوصی گفتگو کرتے ہوئے وزیرخارجہ شاہ محمود قریشی کا کہنا تھا کہ ٹرمپ سے ملاقات میں وزیراعظم عمران خان نے اہم ایشوز اٹھائے، پاکستان نے ایف اے ٹی ایف کا ایشو بھی اٹھایا وزیراعظم نے صدرٹرمپ کو ایف اے ٹی ایف پر سپورٹ کا کہا، وزیراعظم نے پاکستان کی جانب سے کیے گئے اقدامات سے آگاہ کیا۔
انہوں نے کہا کہ وزیراعظم نے صدرٹرمپ کو ٹریول ایڈوائزی میں بہتری کا بھی کہا، وزیراعظم کی صدر ٹرمپ سے تجارت کے حوالے سے بھی گفتگو ہوئی، ملاقات میں فیصلہ ہوا کہ امریکا کا تجارتی وفد پاکستان آئے گا، وزیراعظم نے کشمیر کی صورتحال سے صدرٹرمپ کو آگاہ کیا۔
امریکی صدر نے ایک بار پھر مسئلہ کشمیر پر ثالثی کی پیشکش کر دی
شاہ محمودقریشی کا کہنا تھا کہ صدرٹرمپ نے کشمیر کی صورت حال پر تشویش کا اظہار کیا، صدر ٹرمپ نے کشمیر کے مسئلے پر بات کرنے کا یقین دلایا ہے، ٹرمپ نے مسئلہ کشمیر کے حل کی خواہش کا اظہار بھی کیا، انہوں نے عمران خان پر بھی اپنے مکمل اعتماد کا اظہار کیا۔
وزیرخارجہ نے بتایا کہ وزیراعظم نے صدرٹرمپ کو ایران کے معاملے پر تشویش سے آگاہ کیا۔ ٹرمپ سے افغانستان، افغان امن عمل پر تبادلہ خیال کیا گیا، صدر ٹرمپ سے بہت اچھے ماحول میں ملاقات ہوئی۔
