پاکستانی ذہین اور قابل طلبہ و طالبات دنیا بھر میں اپنی کامیابی کے جھنڈے گاڑ رہے ہیں ان ہی ایک بچہ شاہ زین آفریدی بھی ہے جس نے امریکی صدراتی ایجوکیشن ایوارڈ حاصل کرکے ملک کا نام روشن کردیا۔
یہ ہی نہیں بلکہ اس سے قبل شاہ زین آفریدی کی بہن عیشل آفریدی نے بھی شاندار کارکردگی کا مظاہرہ کرتے ہوئے امریکی صدراتی ایجوکیشن ایوارڈ اپنے نام کیا۔
اے آر وائی نیوز کے پروگرام باخبر سویرا میں شاہ زین آفریدی نے شرکت کی اور اپنی کامیابی سے متعلق محنت اور لگن کے حوالے سے ناظرین کو آگاہ کیا۔
شاہ زین آفریدی نے بتایا کہ میں گھر آکر دو گھنٹے ہوم ورک کرتا ہوں میری پڑھائی میں میری والدہ اور بڑی بہن میری رہنمائی کرتی ہیں۔ اپنے مستقبل کے حوالے سے ان کا کہنا تھا کہ میرا ارادہ ایرو اسپیس انجینئرنگ پروگرام میں داخلہ لینے کا ہے۔
کوئٹہ سے تعلق رکھنے والے پاکستانی نژاد طالب علم شاہ زین آفریدی کو رواں ماہ یو ایس پریزیڈنٹ ایجوکیشن ایوارڈ 2023 شاندار تعلیمی کیرئیر کے اعتراف میں نوازا گیا ہے۔
شاہ زین آفریدی نے نیو جرسی کے فلپ جی وروم اسکول میں گریڈ 8 تک اپنی پہلی پوزیشن برقرار رکھی۔ ان کو شاندار تعلیمی کیرئیر پر ہائی ٹیک اسکول نیوجرسی میں اسکالر شپ کی بنیاد پر داخلہ بھی مل گیا ہے جہاں وہ بغیر کوئی فیس ادا کیے اپنا شاندار تعلیمی سفر جاری رکھیں گے۔
