The news is by your side.

امریکہ پاکستان کی مدد کے لیے تیار ہے، صدارتی ایلچی جان کیری

نیویارک : امریکی صدرجوبائیڈن کے ایلچی جان کیری نے کہا ہے کہ امریکہ پاکستان کے ساتھ انفرا اسٹرکچر سمیت دیگر اقسام کی مدد کے لیے تیار ہے۔

تفصیلات کے مطابق آج نیویارک میں وزیراعظم شہباز شریف سے اقوام متحدہ کی جنرل اسمبلی کے 77ویں اجلاس کے موقع پر امریکی صدارتی ایلچی برائے موسمیاتی تبدیلی جان کیری نے ملاقات کی۔

اس موقع پر وزیر اعظم نے موسمیاتی تبدیلی کے حوالے سے آگاہی پیدا کرنے اور اس بحران کے حل کے لیے جان کیری کی کوششوں کو سراہا۔ انہوں نے ماحولیاتی تبدیلیوں سے نمٹنے کے لیے بائیڈن انتظامیہ کے اہم کردار کا اعتراف بھی کیا۔

وزیراعظم نے پاکستان میں تباہ کن سیلاب کے تناظر میں فوری طور پر امریکی امداد پر شکریہ ادا کیا۔ انہوں نے تعمیر نو اور بحالی کے مرحلے کے دوران بین الاقوامی برادری کے مسلسل تعاون کی ضرورت پر زور دیا۔

وزیراعظم نے بتایا کہ حالیہ سیلاب سے1400 سے زیادہ افراد جاں بحق ہوئے، 33 ملین لوگ موسمیاتی پناہ گزینوں کے طور پر بے گھر ہوئے، جن میں سے چھ لاکھ سے زیادہ حاملہ خواتین تھیں۔ چالیس لاکھ ایکڑ فصل تباہ ہوئی، پاکستان کو ایک بے مثال قدرتی آفت کا سامنا ہے۔

امریکی صدارتی ایلچی جان کیری نے مصیبت کی اس گھڑی میں پاکستانی عوام اور حکومت کے ساتھ یکجہتی کا اظہار کیا اور سیلاب کی وجہ سے درپیش چیلنجز کا سامنا کرنے کے لیے امریکی انتظامیہ کی مسلسل حمایت کا اعادہ کیا۔

انہوں نے کہا کہ امریکہ پاکستان کے ساتھ سیلاب متاثرہ علاقوں کے انفرا اسٹرکچرکی تعمیر نو میں تعاون کے ساتھ ساتھ دیگر اقسام کی مدد کے لیے تیار ہے جو مستقبل میں اس طرح کے بحران کو ٹالنے میں مدد دے گا۔

ملاقات کئ دوران دونوں فریقوں نے عالمی موسمیاتی تبدیلی اور توانائی کے حوالے سے دونوں ممالک کے درمیان قریبی تعاون جاری رکھنے پر اتفاق کیا۔

Comments

یہ بھی پڑھیں