واشنگٹن : امریکی محکمہ خارجہ کے نائب ترجمان کا کہنا ہے کہ امریکا انسداد دہشت گردی معاملات پرپاکستانی رہنماؤں سےباقاعدہ رابطے میں ہیں۔
تفصیلات کے مطابق واشنگٹن میں امریکی محکمہ خارجہ کے نائب ترجمان ویدانت پٹیل نے پریس کانفرنس کرتے ہوئے کہا کہ انسداد دہشت گردی معاملات پر پاکستانی رہنماؤں سےباقاعدہ رابطے میں ہیں.
ان کا کہنا تھا کہ انسداد دہشت گردی پر پاکستان کے ساتھ دو طرفہ مشاورت جاری ہے، ہم علاقائی امور پر پاکستان کے ساتھ بات چیت جاری رکھیں گے.
سکھ رہنما پر حملے کی سازش کے حوالے سے سوال پر امریکی ترجمان نے کہا کہ سکھ رہنما پر حملے کی سازش میں ملوث بھارتی شہری کی امریکا منتقلی پر محکمہ انصاف بات کرسکتا ہے۔
یاد رہے رواں ماہ کے آغاز میں امریکا نے دہشت گردی سے نمٹنے کے لیے پاکستان کے اقدامات کی حمایت کرتے ہوئے کہا تھا کہ دونوں ممالک کے مشترکہ سیکیورٹی مفادات ہیں۔
ترجمان ویدانت پٹیل کا کہنا تھا کہ قومی سلامتی کے امور پر پاکستان کے ساتھ ہماری شراکت داری ہے اور اس شراکت داری میں انسداد دہشتگردی کی صلاحیت کی مالی اعانت شامل ہے۔ انسانی حقوق کے تحفظ کے فروغ کیلیے اٹھائے گئے اقدامات کی حمایت کرتے ہیں اور ایسے اقدامات کی حمایت کرتے ہیں جس سے قانون کی حکمرانی کو فروغ ملے۔
