The news is by your side.

Advertisement

امریکا: پاکستانی خواتین کے لیے بڑی خوش خبری

واشنگٹن: امریکا میں پاکستانی خواتین کے لیے نوبل انعام یافتہ سماجی کارکن ملالہ یوسف زئی اسکالر شپ ایکٹ منظور ہو گیا۔

غیر ملکی میڈیا کے مطابق امریکی پارلیمنٹ کے دونوں ایوانوں نے اعلیٰ تعلیم کے شعبے میں پاکستانی خواتین کی حوصلہ افزائی کے لیے ملالہ یوسف زئی کے نام سے ایکٹ کی منظوری دے دی۔

’ملالہ یوسف زئی اسکالر شپ ایکٹ‘ کے تحت میرٹ اور ضرورت کے مطابق اعلیٰ تعلیم کی خواہش مند پاکستانی خواتین کو دی جانے والی اسکالر شپ کی تعداد میں اضافہ کیا جائے گا۔

پاکستانی خواتین سے متعلق یہ بل مارچ 2020 میں ایوان نمائندگان سے منظور ہوا تھا، بعد ازاں یکم جنوری 2021 کو امریکی سینیٹ میں بھی یہ بل پاس ہوا۔ بل کی دونوں ایوانوں سے منظوری کے بعد اسے امریکی صدر ڈونلڈ ٹرمپ کو دستخط کے لیے وائٹ ہاؤس بھیج دیا گیا ہے۔

بل کے مطابق امریکی ادارہ برائے بین الاقوامی ترقیات 2020 سے 2022 کے درمیان اپنی پچاس فی صد اسکالر شپ پاکستانی خواتین کو فراہم کرے گا۔ پاکستانی خواتین کو اسکالر شپس اہلیت کی بنیاد پر پاکستان کے ہائر ایجوکیشن اسکالر شپ پروگرام کے تحت دی جائیں گی۔

بل میں یو ایس ایڈ سے پاکستان میں تعلیمی پروگرامز کو وسعت دینے اور ان تک رسائی بہتر بنانے کا مطالبہ کیا گیا ہے، اس مقصد کے لیے یو ایس ایڈ پاکستانی نجی شعبے میں سرمایہ کاری کرے اور اس سلسلے میں امریکا میں مقیم پاکستانی کمیونٹی سے بھی مشورہ کرے۔

بل کے اطلاق کے بعد یو ایس ایڈ سالانہ طور پر امریکی پارلیمنٹ کو رپورٹ دے گا کہ صنف، اہلیت اور ڈگری کی بنیاد پر کتنی اسکالر شپس تقسیم کی گئیں، اور یہ کہ کتنے درخواست گزار اہل نہ ہونے کی وجہ سے رد کیے گئے۔

Comments

یہ بھی پڑھیں