امریکی وزیر خارجہ انٹونی بلنکن نے کہا ہے کہ غزہ میں روزانہ ہونے والی شہریوں کی اموات بہت زیادہ ہیں، صورتحال بہتر ہونے پر فلسطینیوں کی واپسی ضرور ہونی چاہیے۔

بین الاقوامی خبر رساں ادارے کی رپورٹ کے مطابق امریکی وزیر خارجہ انٹونی بلنکن نے میڈیا سے بات کرتے ہوئے کہا کہ تنازع کو خطے میں پھیلنے سے بچانے کے لیے اسرائیلی حکام سے جامع بات چیت ہوئی، خطے میں سلامتی کے لیے امریکا اسرائیل سفارتی راستے پر یقین رکھتے ہیں۔

انہوں نے کہا کہ فلسطینی ریاست کا قیام واضح ہونے پر خطے کے ممالک غزہ میں سرمایہ کاری کے لیے تیار ہیں۔ عالمی عدالت انصاف میں جنوبی افریقا کی اسرائیل مخالف درخواست امن کوششوں سے توجہ ہٹانا ہے۔

امریکی وزیر خارجہ انٹونی بلنکن کا کہنا تھا کہ فلسطینیوں کی غزہ سے باہر آباد ہونے کی کسی بھی تجویز کی مخالفت کرتے ہیں، فلسطینی اتھارٹی پر اصلاحات کی ذمہ داری عائد ہوتی ہے۔

امریکی و برطانوی فورسز نے بحیرۂ احمر میں 21 ڈرونز مار گرائے

انہوں نے کہا کہ 7 اکتوبر جیسا حملہ دوبارہ نہ ہونے کا اسرائیلی مقصد حاصل ہونا اہم ہے، ہم اس جنگ کا جلد از جلد خاتمہ چاہتے ہیں۔