امریکی ریاست میئن میں 22 افراد کو فائرنگ کرکے موت کی نیند سلانے والے ملزم کی لاش بر آمد کرلی گئی ہے۔
غیر ملکی ذرائع ابلاغ کے مطابق پولیس کی جانب سے ملزم کی تلاش میں سر توڑ کوششیں کی جارہی تھیں، دو روز کی تلاش کے بعد ملنے والی لاش کو دیکھ کر ایسا محسوس ہوتا ہے کہ سابق امریکی فوجی ملزم رابرٹ کارڈ نے سر میں گولی مار کر اپنی زندگی کا خاتمہ کیا ہے۔
حکام کا کہنا ہے کہ ملزم رابرٹ کارڈ کی لاش اسی ری سائیکلنگ پلانٹ کے قریب جنگل سے برآمد کی گئی ہے جس پلانٹ سے اسے نوکری سے برطرف کیا گیا تھا۔
حکام کے مطابق ملزم نے حال ہی میں اپنی زوجہ سے بھی علیحدگی اختیار کی تھی جبکہ ملزم کے پاس خودکشی کا نوٹ بھی برآمد ہوا ہے۔
موسم گرما میں ملزم کی جانب سے دعویٰ سامنے آیا تھا کہ اسے آوازیں سنائی دیتی ہیں اور اس نے اپنے ہی فوجی اڈے پر گولیاں برسانے کی دھمکی بھی دی تھی۔
یاد رہے کہ دو روز قبل ملزم نے پہلے لیوسٹن شہر میں باؤلنگ کلب میں نہتے افراد پر فائرنگ کی تھی جس سے 10 افراد موقع پر ہی زندگی کی بازی ہار گئے، اس کے بعد لوکل بار اور والمارٹ ڈسٹری بیوشن سینٹر پر بھی شدید فائرنگ کی تھی۔ فائرنگ کے بعد ملزم فرار ہونے میں کامیاب ہوگیا تھا۔
امریکی پولیس کی جانب سے ہدایات جاری کی گئی تھیں کہ ملزم کی گرفتاری تک شہری اپنے گھروں سے باہر نہ نکلیں جبکہ ریاست کی اسپتالوں میں ایمرجنسی کا نفاذ کردیا گیا تھا۔
