واشنگٹن : ترجمان امریکی محکمہ خارجہ میتھیو ملر نے کہا ہے کہ پاکستان میں حکومت بننے سے پہلے کوئی تبصرہ نہیں کرنا چاہتے۔
امریکہ نے ایک مرتبہ پھر پاکستان میں آٹھ فروری کے عام انتخابات کے بعد سوشل میڈیا پلیٹ فارمز پر پابندی پر تشویش کا اظہار کرتے ہوئے کہا ہے کہ اتحادی حکومت کا قیام پاکستان کا اندرونی معاملہ ہے۔
واشنگٹن میں پریس کانفرنس سے خطاب کرتے ہوئے ترجمان امریکی محکمہ خارجہ میتھو ملر نے کہا کہ پاکستان میں اتحادی حکومت بنائے جانے پرتبصرہ نہیں کروں گا۔
ان کا کہنا تھا کہ پاکستان میں اظہار رائے کی آزادی کااحترام ہوتے دیکھنا چاہتے ہیں، حکومت بننے سے پہلے اس پر تبصرہ نہیں کرنا چاہتے۔
ترجمان امریکی محکمہ خارجہ نے کہا کہ کسی بھی ملک میں سیاسی اتحاد اس ملک کا اپنا فیصلہ ہوتا ہے، ہم بےضابطگیوں کے کسی بھی دعوے کی تحقیقات دیکھنا چاہتے ہیں۔
میتھو ملر نے کہا کہ پاکستان میں اظہار رائے کی آزادی پر پابندیوں،انٹرنیٹ اور سوشل میڈیا پلیٹ فارمز پر پابندی پر تشویش ہے۔
ان کا مزید کہنا تھا کہ پاکستان سے سوشل میڈیا تک رسائی کی بحالی اور پاکستانی حکام سے بنیادی آزادیوں کا احترام کرنے کا مطالبہ بھی کرتے ہیں۔
واضح رہے کہ پاکستان میں حالیہ عام انتخابات کے بعد بڑی سیاسی جماعتوں کے رہنماؤں نے اتحادی حکومت بنانے پر اتفاق کیا ہے اور مسلم لیگ ن کے صدر شہباز شریف کو وزارت عظمیٰ کا امیدوار نامزد کیا گیا ہے۔
