واشنگٹن : ترجمان امریکی محکمہ خارجہ میتھیو ملر نے کہا ہے کہ حکومت پاکستان کو مظاہرین کے ساتھ احترام کے ساتھ نمٹنا چاہیے۔
یہ بات انہوں نے واشنگٹن میں پریس کانفرنس کرتے ہوئے کہی اس موقع پر صحافی کی جانب سے پوچھے گئے سوال کہ کیا بائیڈن انتظامیہ اقتدار کی منتقلی سے پہلے پاکستان کو جدید اسلحہ فراہم کرنے کا ارادہ رکھتی ہے؟
جس کے جواب میں میتھیو ملر نے کہا کہ میرے پاس اس وقت اعلان کرنے کے لیے کچھ نہیں ہے، ہم دہشت گردی اور پرتشدد انتہا پسندی کیخلاف جنگ میں پاکستان کے ساتھ کھڑے ہیں۔
امریکی محکمہ خارجہ کے ترجمان سے سوال کیا گیا کہ کیا وزیر خارجہ ٹونی بلنکن کی بھارتی ہم منصب سے اڈانی اور بھارتی ایجنٹ پر عائد فرد جرم کے حوالے سے کوئی بات ہوئی؟
جس کے جواب میں ان کا کہنا تھا کہ میں نجی سفارتی بات چیت پر تبصرہ نہیں کروں گا، تاہم ہندوستانی ہم منصبوں کے ساتھ سکھ رہنما کے قتل کی سازش پر باقاعدگی سے بات ہوتی ہے۔
میتھیو ملر نے پاکستان میں پرتشدد مظاہروں پر تبصرہ کرتے ہوئے کہا کہ پاکستان سمیت دنیا بھر میں احتجاجی مظاہرے پرامن ہونے چاہئیں، حکومت پاکستان کو بھی مظاہرین کے ساتھ احترام کے ساتھ نمٹنا چاہیے۔
