واشنگٹن: امریکا نے بھارت کو 1.17 ارب ڈالر کے سی ہاک ملٹی مشن ہیلی کاپٹر آلات کی ممکنہ فروخت کی منظوری دے دی۔
روئٹرز کے مطابق پینٹاگون نے پیر کو کہا کہ امریکی محکمۂ خارجہ نے ہندوستان کو ایم ایچ-60 آر ہیلی کاپٹروں کے لیے آلات اور متعلقہ سامان کی ممکنہ فروخت کی منظوری دی ہے، جس کی قیمت کا تخمینہ 1.17 بلین ڈالر ہے۔
پینٹاگون نے کہا کہ اس سلسلے میں بنیادی معاہدہ ہتھیار تیار کنندہ کمپنی لاک ہیڈ مارٹن سے ہوگا۔ بائیڈن انتظامیہ نے پیر کو امریکی کانگریس کو فیصلے سے مطلع کیا۔
بھارتی میڈیا رپورٹس کے مطابق ڈیفنس سیکیورٹی کوآپریشن ایجنسی نے کہا کہ اس فروخت سے ہندوستان کی اینٹی سب مرین جنگی صلاحیتیں اپ گریڈ ہوں گی اور مستقبل کے خطرات سے نمٹنے کی صلاحیت میں بہتری آئے گی۔
بھارت میں دنیا کے سب سے بڑے شمسی توانائی پلانٹ کی تیاری
واضح رہے کہ بائیڈن انتظامیہ کی طرف سے بھارت کو اس بڑے دفاعی سازوسامان کی فروخت کی منظوری، حکومت کی چار سالہ مدت پوری ہونے سے چند ہفتے قبل دی گئی ہے۔ نومنتخب صدر ڈونلڈ ٹرمپ 20 جنوری 2025 کو امریکا کے 47 ویں صدر کے طور پر حلف اٹھائیں گے۔
ڈیفنس سیکیورٹی کوآپریشن ایجنسی کے نوٹیفکیشن کے مطابق، ہندوستان نے امریکا سے 30 ملٹی فنکشنل انفارمیشن ڈسٹری بیوشن سسٹم-جوائنٹ ٹیکٹیکل ریڈیو سسٹم (MIDS-JTRS) خریدنے کی درخواست کی ہے۔
