واشنگٹن : امریکی محکمہ خارجہ شعبہ اردو کی ترجمان مارگریٹ میک لاوڈ کا کہنا ہے کہ ہم بھارت کی نظر سے پاکستان کو نہیں دیکھتے ، پاکستان اور بھارت دونوں ممالک ہمارے لئے اہم ہیں۔
تفصیلات کے مطابق واشنگٹن میں امریکی محکمہ خارجہ شعبہ اردو کی ترجمان مارگریٹ میک لاوڈ نے اے آر وائی نیوز سے خصوصی گفتگو کرتے ہوئے کہا کہ امریکا اور پاکستان کے درمیان دیرینہ تعلقات ہیں، پاکستان کے عوام آج بھی دہشت گردی سے متاثرہورہے ہیں۔
مارگریٹ میک لاوڈ کا کہنا تھا کہ دہشت گردی پاکستان کےعوام کیلئےسنگین معاملہ ہے، ہماراغیرسرکاری تنظیموں اورحکومت کیساتھ تعاون جاری رہےگا، دہشتگردی سےنمٹنےکیلئےہم پاکستان کی حکومت کیساتھ ملکرکام کرناچاہتےہیں۔
ترجمان نے کہا کہ پاکستان امریکا تعلقات بھارت اور امریکا کے رشتے سے الگ ہے، ہم بھارت کی نظر سے پاکستان کو نہیں دیکھتے ، پاکستان اور بھارت دونوں ممالک ہمارے لئے اہم ہیں۔
ان کا کہنا ہے کہ دونوں ممالک میں امن ،استحکام اور خوشحالی اہم ہے ،امید ہے پاکستان اور بھارت کے درمیان دوبارہ بات چیت شروع ہوجائے۔
سکھ رہنما کے قتل کے حوالے سے سوال پر امریکی محکمہ خارجہ شعبہ اردو کی ترجمان نے کہا کہ سکھ رہنما کے قتل کی سازش کے بارے میں بھارتی حکومت سے تشویش کا اظہار کیا ہے، ہماری بھارتی حکام کیساتھ بات چیت جاری ہے، ہم نے بھارت سے صاف کہہ دیا ہے کہ مستقبل میں ایسا دوبارہ نہیں ہونا چاہیے۔
نیٹواجلاس کے حوالے سے انھوں نے بتایا کہ نیٹواجلاس میں امریکا نے یوکرین کواسٹریٹجک فضائی دفاعی نظام فراہم کرنے کا اعلان کیا ہے۔
ان کا مزید کہنا تھا کہ اگرروس سنجیدگی سے بات کرنا چاہتا ہے تو ہم بھی بات کیلئےتیارہیں، روس نےیوکرین میں بچوں کےاسپتال پرحملہ کیا، جنگ کے خاتمے کیلئےیوکرین سےبات چیت ضروری ہے۔
امریکی ترجمان نے بتایا کہ ہم بھارت سمیت تمام اتحادیوں سے کہہ رہےہیں وہ یوکرین میں امن کیلئے روس پر دباؤڈالیں، روس اپنی فوجیں یوکرین کی سرزمین سے باہر نکالے۔
