واشنگٹن: امریکی وزیر خارجہ مارکو روبیو نے برطانوی ہم منصب ڈیوڈ لیمی سے وائٹ ہاؤس میں اہم ملاقات کی ہے۔
خبر ایجنسی کے مطابق ملاقات میں دونوں رہنماؤں نے مشرق وسطی کی صورتحال پر طویل گفتگو کی اور ایران کو جوہری ہتھیار حاصل نہ کرنے پر اتفاق کیا ہے۔
برطانوی وزیر خارجہ ڈیوڈ لیمی نےکہا ایران کو کبھی جوہری ہتھیار نہیں بنانے دے سکتے ہیں، مذاکرات کیلئے تاحال ایک ونڈو موجود ہے ہم سفارتی حل کیلئے کوشاں ہیں۔
برطانوی وزیر خارجہ ڈیوڈ لیمی امریکی ہم منصب سے ملاقات کے بعد جنیوا کیلئے روانہ ہوگئے، واضح رہے کہ ایرانی وزیرخارجہ آج یورپی ملکوں کے ہم منصبوں سے ملاقات کریں گے۔
ایران اسرائیل کشیدگی سے متعلق تمام خبریں
عباس عراقچی برطانیہ، فرانس اور جرمنی کے وزرائے خارجہ سے ملیں گے، ملاقات آج جینیوا میں ہوگی، ایرانی وزیر خارجہ کا کہنا ہے ملاقات یورپی ملکوں کی درخواست پر ہورہی ہے۔
جرمن سفارتی ذرائع نے غیرملکی نیوز ایجنسی کو بتایا کہ ایران اور یورپی ملکوں کے وزرائے خارجہ میں مذاکرات ایٹمی پروگرام پرہوں گے۔
دوسری جانب ایرانی میڈیا نے بتایا کہ ملاقات میں یورپی یونین کی خارجہ پالیسی کی سربراہ کاجا کلاس بھی ہوں گی۔
اس کے علاوہ وائٹ ہاؤس کی ترجمان کیرولین لیویٹ نے کہا ہے کہ امریکی صدر ڈونلڈ ٹرمپ ایران سے متعلق حتمی فیصلہ 2 ہفتوں میں کریں گے۔
وائٹ ہاؤس کی پریس سیکریٹری کیرولین لیویٹ نے پریس بریفنگ کے دوران کہا کہ امریکی صدر ڈونلڈ ٹرمپ اگلے دو ہفتوں میں یہ فیصلہ کریں گے کہ آیا امریکا براہ راست ایران کے خلاف جنگ میں اسرائیل کے ساتھ شامل ہو گا یا نہیں۔
