امریکی صدر ڈونلڈٹرمپ کی جانب سے انکار کے بعد نائب صدر مائیک پنس نومنتخب صدر جوبائیڈن کی تقریب حلف برداری میں شریک ہوں گے۔
غیرملکی خبررساں ادارے کے مطابق متعدد میڈیا رپورٹس میں کہا گیا ہے کہ نائب صدر مائیک پنس 20 جنوری کو ہونے والی حلف برداری تقریب میں شریک ہو رہے ہیں۔
طویل عرصے سے مخلص ساتھی کی حیثیت سے ساتھ نبھانے والے مائیک پنس سے صدر ٹرمپ اس وقت ناراض ہو گئے جب انہوں نے نائب صدر کے طور پر جوبائیڈین کے صدارتی الیکشن میں کامیابی کا اعلان کیا تھا۔
ٹوئٹر پر جاری بیان میں ڈونلڈ ٹرمپ نے لکھا تھا کہ وہ سب لوگ جنہوں نے مجھ سے پوچھا تھا انہیں بتانا چاہتا ہوں 20 جنوری کو ہونے والی جوبائیڈن کی حلف برداری تقریب میں شریک نہیں ہوں گا۔
اس سے قبل کی گئی ٹوئٹ میں صدر ٹرمپ نے لکھا کہ جن محب وطن لوگوں نے مجھے ووٹ دیا ان کے ساتھ کسی قسم کا کوئی غیر منصفانہ اور ناجائز سلوک نہیں ہونے دیا جائے گا۔
امریکی کانگریس نے جوبائیڈن کےصدر اور کاملا ہیرس امریکا کی نائب صدر بننے کی توثیق کردی، جس کے بعد جوبائیڈن آئینی طور پر امریکا کے 46ویں صدر بن گئے، امریکی کانگریس کے مطابق جوبائیڈن اور کاملا ہیرس 20جنوری کو حلف اٹھائیں گے۔
پندرہ دسمبر کو امریکہ میں الیکٹورل کالج کی سرکاری ووٹنگ مکمل ہونے کے بعد جوبائیڈن کو باضابطہ طور پر فاتح قرار دے دیا گیا تھا جبکہ ٹرمپ نے ایک بار پھر جوبائیڈن کو صدر ماننے سے انکار کیا تھا، جو بائیڈن نے 306 جبکہ صدر ٹرمپ نے 232 الیکٹورل ووٹ حاصل کئے تھے۔
