اوکلاہوما سٹی : امریکہ میں کتوں اور بلیوں کو بے دردی سے مار کر کھائی میں پھینکے جانے کا انکشاف ہوا ہے، جانوروں کی لاشوں کو ڈبوں اور تھیلوں میں بند کرکے پھینکا گیا۔
تفصیلات کے مطابق امریکی ریاست کے شہر اوکلاہاما سٹی میں جانوروں کے ساتھ انتہائی ظالمانہ سلوک کی خبر سامنے آئی ہے، علاقے کے کچھ نامعلوم افراد گزشتہ کئی ماہ سے کتوں اور بلیوں کو بے دردی سے مار کر ان کی لاشیں ایک کھائی میں پھینک رہے تھے۔
اس حوالے سے علاقے کی رہائشی خاتون اولیویا زین العابدین نے ہیلپ لائن 911پر کال کی جس پر انتظامیہ نے ان کی کال جانوروں کے معاملات دیکھنے والے ادارے کو منتقل کردی جس پر انہوں نے اپنی شکایت درج کروائی۔
اولیویا زین العابدین نے متعلقہ محکمے سے مدد حاصل کرنے کی کوشش کی لیکن انہیں اس کا معقول جواب یا کوئی مدد موصول نہیں ہوئی ہے جس پر انہوں نے ایک مقامی ٹی وی چینل کو صورتحال سے آگاہ کیا۔
انہوں نے میڈیا کو بتایا کہ پچھلے ماہ پورشن آف کلاسن نزد این ڈبلیو 104 روڈ پر اپنی آنکھوں سے ان جانوروں کی لاشوں کو دیکھا جس میں ایک کتے کی کھال کو کھینچ دیا گیا تھا اور دوسرے کو دیکھ کر ایسا لگا کہ جیسے اسے ابھی ابھی مار کر ڈالا گیا ہو۔
ٹی وی انتظامیہ نے اولیویا کی شکایت پر متعلقہ محکمے سے جب رابطہ کیا تو (او کے سی) اینیمل کنٹرول کی جانب سے انہیں بتایا گیا کہ پروگرام کو دیکھ کر فوری طور پر عملے کو مذکورہ مقام پر بھیج دیا گیا ہے۔
