اسلام آباد : وفاقی دارلحکومت اسلام آباد میں بینک ڈکیتیوں میں سرکاری اسلحے کے استعمال کا انکشاف سامنے آیا۔
تفصیلات کے مطابق اسلام آباد پولیس کا جدید سرکاری اسلحہ غیرمجاز شخص کو الاٹ کئے جانے کا انکشاف ہوا ہے۔
خود کو ایس پی یو کا اہلکار ظاہر کرنے والا باوردی شخص اسلام آباد پولیس کے روٹ ہیڈکوارٹرز سے ایس ایم جی گن اور جیکٹ لے کر فرار ہو گیا۔
انچارج سیکیورٹی ڈویژن کی مدعیت میں مقدمہ درج کر لیا گیا ہے ، پولیس ذرائع نے بتایا کہ سیکیورٹی اداروں نے شبہ ظاہر کیا ہے کہ شہر میں حالیہ بینک ڈکیتیوں میں یہی گن استعمال ہوئی۔
تھانہ سیکرٹریٹ میں انچارج سیکیورٹی ڈویژن کی مدعیت میں درج کرائی گئی رپورٹ میں بتایا گیا ہے کہ باوردی شخص نے اپنا نام دلاوراور خود کو ایس پی یو کا اہلکار ظاہر کیا۔
رپورٹ میں کہنا تھا کہ نامعلوم شخص نے بیلٹ نمبر 283 ظاہر کیا ، جو صدام نامی اہلکار کا ہے، نامعلوم شخص نے ایس ایم جی گن نمبر 2183 اور جیکٹ ایشو کروائی۔
انگلینڈ کرکٹ ٹیم کی آمد کے موقع پر یہ اسلحہ الاٹ کرایا گیا، نامعلوم شخص نے دھوکہ دہی سے سرکاری گن کسی غلط مقصد کے لئے جاری کروائی۔
