کراچی : سندھ ہائیکورٹ نے کراچی کے انفراسٹرکچر کیلیے ورلڈ بینک کی جانب سے دیے گئے3 ارب روپے سے زائد فنڈز کے غیر قانونی استعمال سے متعلق درخواست پر متعلقہ اداروں سے جواب طلب کرلیا، عدالت نے استفسار کیا کہ ترقیاتی کاموں پر کتنا پیسہ خرچ ہوا؟۔
تفصیلات کے مطابق سندھ ہائیکورٹ میں ورلڈ بینک کے3ارب 60کروڑ کے فنڈز میں غیر شفافیت سے متعلق درخواست کی سماعت ہوئی جس میں عدالت نے ایف بی آر اور ایڈووکیٹ جنرل سندھ سے جواب طلب کرلیا ہے۔
عدالت نے اس بات کا جواب طلب کیا ہے کہ گزشتہ 3 سالوں کے دوران کراچی سے کتنا ٹیکس اکٹھا ہوا اور استفسار کیا کہ جمع کیے گئے ٹیکس کا کتنا حصہ ترقیاتی کاموں پر خرچ ہوا؟
درخواست گزار کا مؤقف ہے کہ ورلڈبینک کی جانب سے دیئے جانے والے فنڈز کی رقم کا درست استعمال نہیں ہورہا ہے، عدالت نے آبرویشن دی کہ یہ معاملہ مفاد عامہ کے زمرے میں آتا ہے۔
بعد ازاں عدالت نے سندھ ہائیکورٹ بار ایسوسی ایشن کے صدر کو بھی نوٹس جاری کرتے ہوئے ہدایت کی کہ وہ آئندہ سماعت پر معاونت کے لیے پیش ہوں۔
قبل ازیں کیس کی گزشتہ سماعت میں درخواست گزار کے وکیل نے موقف دیا تھا کہ کراچی کے انفراسٹرکچر کیلیے 3 ارب 60 کروڑ روپے کے منصوبے جاری ہیں، یہ منصوبہ کامپیٹیٹو اینڈ لائیو ایبل سٹی آف کراچی (کلک) کے نام سے جاری ہے۔
قواعد کے مطابق منصوبوں میں شفافیت لازمی ہے لیکن فریقین نے کسی بھی ترقیاتی منصوبے کیلیے اشتہار تک جاری نہیں کیا۔
درخواست گزار کے مطابق فریقین یہ کام ایمرجنسی کی آڑ میں کر رہے ہیں، پراجیکٹ کے ہر منصوبے کے ٹینڈر کیلیے اشتہارات جاری کرنے کی ہدایت کی جائے۔
