شوبز انڈسٹری کی معروف اداکارہ اشنا شاہ نے بتادیا کہ ان کی شوہر حمزہ امین سے پہلی ملاقات کہاں ہوئی تھی۔
اے آر وائی ڈیجیٹل کے ڈرامہ سیریل ’حبس‘ اور ’بلا‘ میں مرکزی کردار نبھانے والی اداکارہ اشنا شاہ نے گزشتہ دنوں نجی ٹی وی کے مزاحیہ پروگرام میں شرکت کی اور شوہر حمزہ امین سمیت شادی کے لباس پر تنقید کرنے والوں پر کھل کر گفتگو کی۔
اشنا شاہ نے بتایا کہ شوہر حمزہ امین سے ملاقات کسی تیسرے شخص نے ایک تقریب میں کروائی تھی پھر دونوں میں پیار اور شادی ہوگئی۔
اُشنا شاہ کا بتانا تھا کہ اُن کے شوہر اپنی یونیورسٹی کی تعلیم حاصل کرنے تک پاکستان، اسلام آباد میں تھے، اُس کے بعد وہ آسٹریا چلے گئے تھے۔
اداکارہ نے شو کے دوران اپنے شادی کے لال لہنگے اور اس پر ہونے والی تنقید پر بھی کھُل کر بات کی۔
اُشنا شاہ کا کہنا تھا کہ میرا شادی کا لہنگا دیکھ کر مداحوں کو لگا کہ جیسے یہ بھارت سے مجھے مودی نے بھجوایا ہے، میں کوئی اینٹی اسٹیٹ بھارتی دُلہن بن گئی ہوں، اُن کی والدہ سمیت پاکستان کی سب ہی خواتین شادی پر لال رنگ پہنتی ہیں۔
اداکارہ کا کہنا تھا کہ اُنہیں اتنی تنقید کا نشانہ بنایا کہ وہ اپنا سوشل میڈیا اکاؤنٹ ڈی ایکٹیویٹ کرنے پر مجبور ہو گئی تھیں۔
