لاہور: وزیراعلیٰ پنجاب سردار عثمان بزدار کا کہنا ہے کہ نکاسی آب ہونے تک افسران فیلڈز میں موجود رہیں، ٹریفک کی روانی کو برقرار رکھنے کے لیے حکام اقدامات کریں۔
تفصیلات کے مطابق وزیراعلیٰ پنجاب سردار عثمان بزدار نے پانی کی جلد نکاسی کے لیے وضع ایس او پیز پر عمل کی ہدایت کرتے ہوئے کہا کہ نکاسی آب کا کام جلد ازجلد مکمل کیا جائے۔
سردار عثمان بزدار نے کہا کہ نکاسی آب ہونے تک افسران فیلڈز میں موجود رہیں، ٹریفک کی روانی کو برقرار رکھنے کے لیے حکام مؤثر اقدامات کریں۔
محکمہ موسمیات کے مطابق آئندہ 12 گھنٹوں کے دوران اسلام آباد، راولپنڈی، سرگودھا، گوجرانوالہ، لاہور، فیصل آباد، ہزارہ، مالاکنڈ، پشاور، مردان اور کشمیر میں گرج چمک کے ساتھ انتہائی شدید بارش کا امکان ہے۔
محکمہ موسمیات کے مطابق آج صبح اسلام آباد میں 30 ڈگری، لاہور میں 29، کراچی میں 30، کوئٹہ، گلگت اور مظفرآباد میں 21 اور مری میں 18 سینٹی گریڈ ریکارڈ کیا گیا۔
محکمہ موسمیات کا کہنا ہے کہ اگلے تین روز تک مزید بارش کا امکان ہے۔
